Në “sitë” kontratat e qirasë së tokave bujqësore të dhëna me qira! Kontratat e reja me çmime 5-27 mijë lekë për hektar, me afate 10-99 vite
Këshilli i Ministrave ka miratuar kriteret e reja për dhënien me qira të tokave bujqësore që janë në pronësi të shtetit. Vendimi parashikon edhe një nen tranzitor që fut në “sitë” të gjitha kontratat ekzistuese të cilave do t’u rishikohen vlerat e qirasë, në varësi të normës së inflacionit.
Ndër të tjera, vendimi përcakton afate qiraje 10-30 dhe 99 vjeçare, në varësi të projektit të investimit bujqësor. Afati 99 vjeçar është për toka që merren me qira për krijim ullishtash e pemëtoresh frutore, raporton SCAN.
Po ashtu, vendimi përcakton edhe tarifat minimale të qirasë vjetore, që variojnë në varësi të bonitetit të tokës, nga 5 mijë lekë në vit për hektarë deri në 27 mijë lekë. Rivlerësimi i vlerës së qirasë do të bëhet çdo 5 vjet, bazuar në normën mesatare të inflacionit në 5 vitet e fundit, sipas Bankës së Shqipërisë.
Ky rregull do të zbatohet edhe për kontratat e lidhura në zbatim të vendimit nr.460, datë 22.5.2013, të Këshillit të Ministrave, “Për përcaktimin e kritereve, të rregullave dhe procedurave të dhënies me qira të tokave bujqësore në pronësi të shtetit”, të ndryshuar, si dhe ato të lidhura nga ish-drejtoritë e bujqësisë. Për qëllim të rivlerësimit, për kontratat ekzistuese afati 5-vjeçar do të fillojë të përllogaritet nga data e hyrjes në fuqi të këtij vendimi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.