Në sitën e Vetting-ut – Islamaj: Pronat i kam trashëguar. Prençi me pasuri modeste
E marta ka qenë një ditë e ngarkuar për Komisionin e Pavarur të Kualifikimit, i cili për herë të parë që prej nisjes së punës ka zhvilluar dy seanca brenda një ditë: E para ndaj anëtarit të Gjykatës së Lartë Edmond Islamaj dhe e dyta ndaj Prokurorit të Krimeve të Rënda Dritan Prençi.
Sipas Komisionit të Pavarur të Kualifikimit, Gjyqtari Islamaj zotëron një apartament prej 81.5 metrash katrorë të dhuruar nga prindërit, 1 mijë metra tokë arë në Karpen dhe një llogari bankare prej 20 mijë eurosh. Ndërkohë që bashkëjetuesja e tij zotëron 1 apartament bashkë me një dyqan dhe një garazh në Durrës, si dhe dy garsoniere te Shkëmbi i Kavajës, të përfituara nga pronësia e tokës së babait të saj mbi sipërfaqen ku më pas është ndërtuar një pallat.
I pranishëm personalisht në seancën dëgjimore, Gjyqtari Islamaj tha se të gjitha pronat familjare ishin rrjedhojë e pasurisë së trashëguar nga gjyshërit. Ndaj tij kanë ardhur 6 denoncime, por Komisioni i Pavarur i Kualifikimit bëri me dije se ato i janë adresuar trupave gjykuese që kanë shqyrtuar çështjet në fjalë dhe jo Islamajt personalisht.
Ndërkohë që shumë më modeste ka qenë pasuria e Prokurorit të Krimeve të Rënda Dritan Prençi, një prej hetuesve të çështjes Tahiri. Ai zotëron një apartament me sipërfaqe 71 metra katrorë në Kashar me vlerë 31 mijë euro të blerë me kredi. shuma e pashlyer e kësaj kredie, sipas relatores së çështjes është 936 mije leke. Po ashtu, ai zotëron edhe 1/8 e dy parcelave bujqësore të përfituara nga familja e tij.
Ndaj tij është bërë një kallëzim penal nga një shtetas i cili ka pretenduar shkelje të etikës, por denoncimi nuk ka pasur elementët e nevojshëm për nisjen e hetimeve. Vendimi përfundimtar për konfirmimin apo shkarkimin nga detyra të të dy magjistratëve do të jepet nga Komisioni i Pavarur i kualifikimit më 7 qershor.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.