Në sitën e Vetting-ut – Pranë konfirmimit Anila Leka e Prokurorisë së Përgjithshme
Ka qenë radha e Anila Lekës, Prokurore pranë Prokurorisë së Përgjithshme të paraqitet mesditën e së hënës përpara Komisionit të Pavarur të Kualifikimit për t’ju nënshtruar Vetting-ut.
Me shumë gjasa ajo do të bëhet emri i katërt që kalon Vetting-un, duke qenë se nga hetimi i Komisionit të Pavarur të Kualifikimit rezulton se ajo nuk ka probleme me pasurinë, me integritetin personal e profesionalizimin.
Sipas Suela Zhegut, relatore e çështjes, Prokurorja Leka zotëron një apartament me sipërfaqe 91.5 metra katrorë në Tiranë me vlerë 34 mije dollarë, si dhe një apartament në Golem me sipërfaqe 74 metra katrorë, me vlerë 3 milionë leke, i paregjistruar ne hipotekë.
Sipas relacionit, Leka zotëron rreth 3.5 milionë lekë të investuara në bono thesari, si dhe një llogari bankare prej 230 mijë lekësh.
Dy personat e lidhur me të, babai dhe mamaja e saj kanë deklaruar dy depozita personale përkatësish 7 mijë dollarë dhe 9 mijë dollarë, të përfituara prej statusit të ish të përndjekurit politik.
Anila Leka është një ndër emrat e përzgjedhur me prioritet për t’ju nënshtruar procesit të Vetting-ut, duke qenë se ajo është kandidate për Këshillin e Lartë të Prokurorisë. Vendimi përfundimtar për karrierën e Lekës do të jepet më 6 qershor.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.