Në Vetting Sokol Binaj – Gjyqtari, sqarime për dy apartamente në Tiranë dhuratë nga vëllai e motra
Dhurimi i dy apartamenteve në Tiranë nga familjarët ka qenë e vetmja pikëpyetje së cilës ju desh t’i jepte përgjigje gjyqtari i Apelit të Krimeve të rënda Sokol Binaj përpara Komisionit të Vettin-ut. Ai u paraqit përpara Trupës së Komisionit të Pavarur të Kualifikimit për t’ju nënshtruar procesit të rivlerësimit për të tre komponentët, pasurinë, integritetin dhe aftësisë profesionale.
Sipas relates së çështjes, Binaj kishte marrë fillimisht në formën e dhuratës nga i vëllai gjysmën e një apartamenti prej 62 metrash katrorë në Tiranë në pronësi të përbashkët, i përfituar me privatizim. Dhurimi është bërë në vitin 2018, vit kur edhe e motra i ka dhuruar një tjetër apartament ngjitur me të parin, me sipërfaqe 77.9 metra katrorë. Trupa gjykuese u interesua për burimet financiare të vëllait dhe motrës së gjyqtarit që kishin bërë dhurimet.
Gjyqtari zotëron edhe një mjet të tipit Citroen të blerë 12 mijë euro me leasing, ndërkohë që nuk kishte depozita bankare. Komisioni i Pavarur i Kualifikimit solli në vëmendje se Gjyqtari kishte marrë vlerësime pozitive si nga ILDKPKI, nga DSIK ashtu dhe nga kontrollet për aftësitë profesionale.
Në drejtim të Binajt në Komisionin e Pavarur të Kualifikimit kishin mbërritur dy ankesa nga qytetarë, por që duket se nuk përbënin indicie për hetime të thelluara. Komisioni i Vetting do të vendosë në vijim nëse do të konfirmojë apo do të shkarkojë nga detyra Gjyqtarin e Apelit të Krimeve të Rënda Sokol Binaj.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.