Nënpunësi i Google: Inteligjenca artificiale po vetëdijësohet – Kompania e pushoi nga puna pasi ai tha se tashmë duhet marrë leje për eksperimente

Blejk Lemuan është një inxhinier informatike dhe është i bindur se një sistem inteligjence artificiale e Google, për të cilën punon, ka fituar pavarësi dhe vetëdije për ekzistencën e tij. Ai është kaq i bindur për këtë sa i ka kërkuar shumë drejtuesve të kompanisë që të përballen me këtë problem. Por përgjigja që mori ishte pushimi nga puna me akuzën se ka bërë publike informacione të rezervuara për teknologjinë e përdorur nga Google. Kompania gjithashtu përjashtoi mundësinë se një inteligjencë artificiale është bërë e ndjeshme, por pavarësisht kësaj Lemuan vazhdon të mbështesë bindjen e tij.

Si shumë kompani të tjera informatike, Google punon prej kohësh në zhvillimin e sistemeve të ndryshme të inteligjencës artificiale, me objektivin për të bërë gjithnjë e më të saktë motorin e kërkimit dhe shërbimet e tjera jo vetëm për kërkimet on line. Disa prej këtyre sistemeve janë integruar në mënyrë eksperimentale në disa funksione të motorit të kërkimit, si për shembull për të përmirësuar përkthimin automatik të teskteve ose njohjen e imazheve, ndërsa të tjerë janë ende eksperimentalë dhe të disponueshëm vetëm për provë për disa nga nënpunësit e kompanisë.

Një fushë e kërkimit dhe zhvillimit në të cilën Google po punon shumë është prodhimi i bisedave në gjuhën natyrore, përmes sistemeve automatike që imitojnë mënyrën se si njerëzit flasin dhe janë në gjendje të kryejnë biseda normale. Projekti më premtues dhe më i avancuar quhet Modeli gjuhësor për Aplikimet e Dialogut (LaMDA) dhe është ai që sipas Lemuan po ndërgjegjësohej për ekzistencën e tij dhe rrjedhimisht për implikimet e pranisë së tij në botë.

Lemuan ka punuar në ushtrinë e Shteteve të Bashkuara të Amerikës, e përshkruan veten në disa raste si “prift” dhe si studiues në fushën e inteligjencës artificiale. Ai u tha drejtuesve të Google se ai mendon se LaMDA mund të krahasohet me një fëmijë 7-8 vjeç dhe se programuesit duhet t’i kërkojnë në mënyrë eksplicite leje përpara se të kryejnë eksperimente që përfshijnë atë. Lemuan më pas akuzoi menaxherët e burimeve njerëzore të Google për diskriminim ndaj besimit të tij fetar.

Në një postim të publikuar në Medium, Lemuan përshkroi përvojën e tij me LaMDA: “Gjatë gjashtë muajve të fundit, LaMDA ka qenë tepër këmbëngulëse në komunikimin e asaj që do dhe ato që beson se janë të drejtat e saj si person.

Ashtu si në shumë kompani të tjera, punonjësve të Google u kërkohet të mos zbulojnë informacione të caktuara në lidhje me projektet dhe aktivitetet në të cilat po punon kompania. Megjithatë, ekzistenca e LaMDA është e njohur dhe shpesh publikohen studime dhe analiza mbi evolucionin e kësaj teknologjie.

Sipas shumicës së ekspertëve, është ende herët për të pasur një softuer të inteligjencës artificiale që është në gjendje jo vetëm të njohë ekzistencën e tij, por edhe të kuptojë implikimet e të qenit pjesë e botës, megjithëse në një mjedis virtual të lidhur gjithnjë e më shumë me atë real.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.