Nënshkruhen dy marrëveshje me Zvicrën – Do të investohen 8.2 mln euro në fushat e qeverisë dhe ekonomisë

Shqipëria dhe Zvicra kanë nënshkruar  dy marrëveshje me vlerë 8.2 milion euro në fushat e qeverisjes dhe ekonomisë. Nënshkrimi u firmos nga zëvendëskryeministrja shqiptare Sendia Mesi dhe Ambasadorja Ruth Huber, Shefe e Departamentit për Bashkëpunimin me Evropën Lindore në Ministrinë e Punëve të Jashtme të Zvicrës.

Njëra nga marrëveshjet ka të bëjë për Programin e Decentralizim dhe Zhvillim Lokal (dldp) dhe tjetra për RisiAlbania, një program punësimi për të rinjtë.

Të dy projektet arrijnë një vlerë prej 8.2 milion Euro dhe janë vazhdim i fazave të mëparshme të mbështetjes zvicerane për Shqipërinë.

Pas nënshkrimit të dy marrëveshjeve, Mesi u ndal tek 2 projektet duke i cilësuar ato si shumë të rëndësishme dhe duke nënvizuar faktin se në fazat e mëparshme kanë rezultuar shumë të suksesshme.

Për sa i përket Programit për Decentralizim dhe Zhvillim Lokal (dldp), Mesi shprehu bindjen se ky projekt edhe pse në fazën finale do të kontribuojë në tej në forcimin e qeverisjes lokale.

Në lidhje me marrëveshjen e dytë për “RisiAlbania”, zëvendëskryeministrja Mesi nënvizoi faktin se një projekt i tillë i cili ka në fokus punësimin e të rinjve në sektor të ndryshëm si inovacioni, bujqësia, zhvillimi rural apo turizmi, i përgjigjet më se miri edhe prioritetit kryesor të qeverisë shqiptare, që është punësimi.

“Si rezultat, ne besojmë që një projekt i tillë, do të ndihmojë edhe qeverinë shqiptare në realizimin e këtij objektivi”, shtoi Mesi.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.