Nënshkruhet marrëveshja me DPA – Kryqi i Kuq Shqiptar do të digjitalizojë fondin arkivor nga viti 1929 – 1969

Drejtoria e Përgjithshme e Arkivave ka nënshkruar sot një marrëveshje me Kryqin e Kuq për digjitalizimin e plotë të të gjithë fondit arkivor nga vitit 1929 -1969. Kjo do të realizohet me burimet financiare, njerëzore dhe teknologjike të vetë Kryqit të Kuq Shqiptar, por nën mbikëqyrjen e DPA.

Drejtori i Përgjithshëm i Arkivave Ardit Bido tha se dokumentacioni i cili do të digjitalizohet, është me rëndësi të ruhet në bazë të normave ndërkombëtare të arkivistikës.

“Projekti vjen në kuadër të projekteve të ngjashme që Drejtoria e Përgjithshme e Arkivave ka kryer me institucione të tjera në vend në mënyrë që të arrijmë digjitalizimin masiv të fondeve arkivore të institucioneve që kanë mundësi ta kryejnë këtë duke lënë një kopje digjitale në Drejtorinë e Arkivave dhe një kopje digjitale ta kenë ata si fond krijues që është një prej dy objektivave tona në kuadër të digjitalizimit, krahas digjitalizimit on-demand që do të nisi vitin e ardhshëm, pra digjitalizimi masiv i dokumentacionit në kuadër të projekteve në të cilat në pamundësitë tona buxhetore janë në kuadër të marrëveshjeve të bashkëpunimit me institucionet e tjera që përbën një hap të rëndësishëm në mënyrën se si konceptohet ky proces kaq i rëndësishëm për ruajtjen e dokumentacionit arkivor” -tha Bido .

Ndërkohë, Artur Katuçi vlerësoi bashkëpunimin me DPA, duke e cilësuar historinë si një aspekt të rëndësishëm për Kryqin e Kuq Shqiptar dhe për shoqërinë shqiptare.

Kopjet digjitale të të gjithë dokumentacionit do të mbesin të aksesushme për të gjithë.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.