Nënstacioni i Golemit – Rama: Investime që nuk janë bërë në 40 vjet
Zona e Golemit në Durrës e cila mbipopullohet gjatë sezonit turistik, pritet të mos vuajë nga ndërprerjet e energjisë elektrike. Rikonstruksioni i nënstacionit të Golemit pritet të sigurojë furnizim me energji për të gjithë zonën nga Plepat deri në Shkëmbin e Kavajës në Golem.
I pranishëm në këtë aktivitet ishte edhe kryeministri Edi Rama, i cili foli për një numër të lartë investimesh të kryera.
“Rilindje në kuptimi në vërtetë të fjalës nga pikëpamja e infrastrukturës e energjisë dhe infrastrukturës së ujësjellës-kanalizimeve. Këtu as drita, as uji dhe ujërat e zeza derdheshin në det dhe në gropa septike. Sigurisht që ka kërkuar kohën e vetë. Ka dhe pak kohë që duhet të bëjnë durim njerëzit, sepse nuk mund të bëhen dot brenda ditës. Janë projekte që kanë pasur nevojë që të rishikohen nga e para. Janë investime që nuk janë bërë 40 vjet”, tha Rama.
Nga ana e tij, drejtori i OSHEE, Ardian Çela, foli për projekte të tjera investimesh që prekin të gjithë zonën bregdetare në këtë qark.
“Ndërkohë ka nisur faza e dytë, ku investimi po shtrihet në gjithë zonën bregdetare nga Shkëmbi i Kavajës deri në Qerret. Ky investim që shkon në total 900 milionë lekë zhvillon një infrastrukture elektrike të përshtatshme për gjithë zonën bregdetare, që jo vetëm garanton një shërbim cilësor duke filluar nga ky sezon turistik, por parashikon zhvillimin afatgjatë të Golemit si zonë turistike”, u shpreh Çela.
Sipas administratorëve lokalë, investimi në fjalë pritet të sigurojë furnizim pa ndërprerje me energji elektrike dhe nga ky investim në këtë zonë pritet të përfitojnë rreth 9 mijë banorë.
Florenc Drizari/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.