Nevoja për drejtim të ri, Meta: LSI do të zgjidhë problemet jetike të qytetarëve
Lëvizja Socialiste për Integrim zhvilloi një takim me banorët e Pustecit ku u prezantuan edhe kandidatët për deputet të LSI-së për qarkun e Korçës.
Gjatë fjalës së tij në këtë aktivitet, Meta u shpreh se bashkëjetesa ndëretnike është një nga pikat kryesore të programit të LSI-së e cila duhet zhvilluar dhe ruajtur si garant i stabilitetit të vendit. Ndërsa Edmond Panariti u ndal në programin konkret që ka kjo forcë politike.
“Ne besojmë se Shqipëria është më e bukur, është më shpresëdhënëse, kur jemi të gjithë bashkë, por edhe kur këtë larmi të madhe, edhe kulturore, edhe etnike edhe fetare ne e ruajmë dhe e zhvillojmë si drita e syve. LSI ka vetëm tre tabu që nuk preken: e para është stabiliteti i Shqipërisë. Kjo më është e rëndësishme se çdo gjë tjetër. E dyta janë marrëdhëniet me fqinjët, sepse çdo acarim i marrëdhënieve me fqinjët cenon drejtpërdrejtë edhe stabilitetin e Shqipërisë. Dhe e treta është integrimi evropian i Shqipërisë”, u shpreh Meta duke shtuar se Shqipërisë i duhet një drejtim i ri, që synon zgjidhjen e problemeve më jetike të qytetarëve shqiptare.
“Në programin e LSI-së ne kemi parashikuar 5 herë më shumë fonde për agro-përpunimin, për argro-biznesin. Në kontrast me atë që kanë ndodhur deri tani ku fondet për fshatin shkuan për fasada, shkuan për palma dhe nuk u përqendruan asnjëherë në bujqësi”, tha Panariti duke shtuar se LSI zhvillimin e vendit e sheh nëpërmjet zhvillimit ekonomik dhe jo nëpërmjet ndryshimit te fasadave.
LSI po vazhdon fushatën në të gjithë vendin me pretendimin për të dalë forcë e parë pasi programi i saj bazohet tek të rinjtë që janë e ardhmja e vendit.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.