Nga 6G tek ‘big data’/ Si Kina po kërkon të rrisë aksionet e teknologjisë në ekonominë e saj?!
Kina po synon të rrisë pjesën e ekonomisë dixhitale në produktin e saj të brendshëm bruto deri në vitin 2025, e nxitur nga teknologjitë e gjeneratës së ardhshme si interneti 6G dhe të dhënat e mëdha ose ndryshe ‘big data’. Ambicia nënvizon shtytjen e Kinës për të ecur përpara në teknologjinë e re, ndërsa vazhdon një rivalitet me SHBA-në në fushat nga gjysmëpërçuesit deri tek inteligjenca artificiale.
Në një dokument të publikuar javën e kaluar, Këshilli Shtetëror i Kinës, organi më i lartë ekzekutiv i vendit, tha se “industritë kryesore të ekonomisë dixhitale” do të përbëjnë 10% të PBB-së së saj deri në vitin 2025, nga 7.8% në 2020. Objektivat janë pjesë e Planit të 14-të Pesëvjeçar të Kinës, një plan zhvillimi që zgjat nga 2021 deri në 2025. Vitin e kaluar, Kina theksoi fushat e “teknologjisë kufitare” për të cilat do të nxisë kërkimin dhe do të synojë vetë-mjaftueshmërinë brenda vendit. Dokumenti i fundit i Këshillit të Shtetit jep edhe objektiva më specifikë për vitet e ardhshme.
Për shembull, Kina synon që shitjet kombëtare me pakicë në internet të rriten nga 11,76 trilion juanë në 2020 në 17 trilion juanë në 2025. Ajo pret që industria e softuerit dhe teknologjisë së informacionit të rritet nga 8,16 trilion juanë në 2020 në 14 trilion juanë në 2025.
Kina parashikon që përdoruesit e brezit të gjerë gigabit, shpejtësia aktuale e lidhjes më të shpejtë të internetit, të rritet nga 6.4 milionë në 2020 në 60 milionë në 2025. Në fakt, rritja e lidhjeve dhe shpejtësive të internetit është pjesë e strategjisë së Kinës për të rritur pjesën e ekonomisë dixhitale në PBB. Kina do të promovojë vendosjen komerciale dhe aplikimin në shkallë të gjerë të 5G, sipas planit. 5G lidhet me internetin e gjeneratës së ardhshme që premton shpejtësi super të larta. Tashmë ka filluar të shpërndahet në Kinë dhe vende të tjera.
Por plani i Pekinit parashtron gjithashtu ambicie në internetin 6G ose të gjeneratës së gjashtë. Kina planifikon të rrisë mbështetjen për kërkimin dhe zhvillimin 6G dhe të përfshihet në krijimin e standardeve ndërkombëtare për 6G. Kina filloi të hedhë themelet për punën në 6G në 2019. Gjenerata e pestë sapo ka filluar të shfaqet dhe nuk ka ende standarde apo përkufizime të dakordësuara se çfarë është 6G.
Ekonomia e dytë më e madhe në botë synon gjithashtu të marrë një rol më të madh në formësimin e standardeve të teknologjisë në mbarë botën, një veprim që analistët thanë se mund të ketë implikime të mëdha për fuqinë që Pekini zotëron në fusha nga interneti celular deri te inteligjenca artificiale. Standardet shpesh dakordësohen globalisht për rregullat teknike për mënyrën se si funksionojnë teknologjitë. CNBC
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.