Nga e hëna rikthehen urbanët në Tiranë! Shoqata bën të ditur detajet e marrëveshjes së re dhe paralajmëron
Këtë të hënë në kryeqytet nis transporti publik. Kjo bëhet e ditur nga shoqata e transportit ndërqytetas. Operatorët e transportit publik bëjnë të ditur se vendimi vjen pas një marrëveshje të arritur me Bashkinë e Tiranës.
“Pas zgjidhjes së pjesshme të kërkesave tona, tashmë të bëra publike, në marrëveshje me Kryetarin e Bashkisë, Veliaj, Ju bëjmë me dije vendimin e të gjithë operatorëve të transportit publik në qytetin e Tiranës për rifillimin e shërbimit të transportit qytetës në Tiranë në kushte të reja në përputhje me stuatën epidemike.
BashkiaTiranë, sipas kërkesës tonë, ka rishikuar dhe ka bërë ndryshimin e protokollit të sigurisë, ku ndër të tjera, sipas legjislacionit në fuqi, ka lehtësuar përgjegjësinë ligjore të operatorëve duke bërë të mundur operimin në linjë.
Bazuar nga sa më lart, ne, operatorët e transportit publik në Tiranë, kemi marrë vendimin për të rifilluar shërbimin në linja me kapacitete të përshtatura me kushtet e reja, në respekt të kërkesës së Kryetarit të Bashkisë dhe të qytetarëve të Tiranës, me qëllim mundësimin e ofrimit të këtij shërbimi në qytet” njofton shoqata.
Ndërkohë me Bashkinë Tiranë do të vijojë diskutimi i kushteve për hartimin e një kontrate shtesë me kushte dhe afate të përcatuara për zbatim nga secila prej palëve (bashkia dhe operatorët).
“Moszbatimi i kushteve të kontratës shtesë do të përbëjë shkak në ditët në vijim për rindërprejen e këtij shërbimi” paralajmërojnë operatorët e transportit publik.
Shoqata shkruan me tej në deklaratë se mbetet shpresë plot se do të plotësohen edhe kërkesat ekonomike, të dakordësuara në marrëveshjen me bashkinë, pasi në rast të kundërt, situata e krijuar “do të na çojë drejt falimentit të sigurt”.
Në fund, operatorët i bëjnë thirrje të gjithë përdoruesve të transportit publik, që të respektojnë protokollin e sigurisë antiCovid-19, për shëndetin e tyre dhe të stafit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.