Nga e importojmë naftën? Kryesisht nga Italia dhe Serbia, në listë mungon Lindja e Mesme
Produktet hidrokarbure dhe të gjitha derivatët e tyre janë të parët në listën e importeve në vendin tonë. Gjatë vitit të kaluar, në Shqipëri hynë produkte në kategorinë e lëndëve djegëse minerale prej 61.7 miliardë lekësh, çka përkthehet në rreth 470 milionë euro.
Këto importe zënë 9% të totalit të importeve në vendin tonë në vlerë. Por nga vjen karburanti që konsumohet në vendin tonë?
Në vend të parë të padiskutueshëm qëndron Italia me 14.8 miliardë lekë, ose 114 milionë euro në vit, sipas të dhënave që i referohen të 12 muajve të vitit të kaluar. Pas Italisë ndërkohë ndjek Serbia me 9.2 miliardë lekë, ose rreth 70 milionë euro në vit importe.
Vendin e tretë e zë Zvicra me 7.4 miliardë lekë importe të lëndëve djegëse minerale dhe produkteve të tjera si vajra mineralë. Pas Zvicrës ndjek Greqia me 6.6 miliardë lekë. Egjipti me 4.2 miliardë lekë mbyll 5 vendet e para të listës së eksportuesve më të mëdhenj të naftës dhe derivateve të saj në vendin tonë.
Rusia, Mali i Zi, Spanja, Rumania dhe Algjeria ndërkohë mbyllin 10-tëshen e parë. Pra, siç duket mjaft qartë, pjesë e listës nuk janë vendet prodhuese të naftës, por vendet me të cilat kemi lidhje të ngushta transporti, kryesisht fqinjët.
Në listën e vendeve nga të cilët ne importojmë lëndë djegëse minerale figurojnë edhe vende si India, Singapori, Swazilandi apo edhe Koreja e jugut, sa për të përmendur disa prej tyre. Nga Arabia Saudite ndërkohë, që është edhe prodhuesi më i madh në botë i naftës, importojmë zero litra.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.