Nga komisioni i posaçëm te shpallja e vendeve të lira për regjistrues në çdo bashki! Çfarë do të ndodhë në hipoteka pas shkarkimit të drejtuesve?
Kryeministri Edi Rama u ka kërkuar drejtuesve të hipotekave në mbarë vendin që të japin dorëheqjen nga posti brenda 24 orëve. Ndërsa bëri publike kërkesën, kryeministri shpjegoi edhe se si do të procedohet me zëvëndësimin e tyre. Për këtë qëllim do të ngrihet një komision i posaçëm i kryesuar nga kryeregjistruesja Blerina Doracaj.
“Në proces do të bëhen të gjithë verifikimet dhe që nga ndjekjet penale deri tek marrja në punë apo mbajtja në punë apo rimarrja në punë e të gjithë atyre që kanë një lidhje me historinë e hipotekave që kanë profesionalizëm e dinjitet, do të bëhet nga një komision i posaçëm që do të ngrihet nga Drejtorja e Përgjithshme e Hipotekave deri në reformimin e plotë të këtij institucioni dhe në bashkimin e disa institucioneve për t’i dhënë drejtim çështjes së pronës dhe titujve të pronësisë” tha Rama ndërsa u kërkonte dorëheqjen regjistruesve.
Ndërkohë, në postimin e tij që shoqëron videon e takimit, kryeministri paralajmëron një shpallje të kërkesës publike për kandidatë, për pozicionin e regjistruesit në çdo bashki. Ky sipas kryeministrit, është vetëm hapi fillestar në rrugën e një reforme rrënjësore për të bërë shtet në hipotekë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.