Nga Prilli, ndërhyrje masive për rehabilitimin e rrugëve – Gjiknuri: Akset kryesore do të pajisen me ndriçim

Mirëmbajtja e rrugëve ka qenë kryefjala e takimit për krijimin e Flotës së Solidaritetit. Kompanitë e kontraktuara për mirëmbajtjen e rrugëve në bashkëpunim me autoritetet do të angazhohen në reagimin e shpejtë për të garantuar kalueshmërin e akseve kombëtare, kur kushtet e motit janë të rënduara.

Duke folur për investimet që rrisin sigurinë rrugore, ministri i Infrastrukturës, Damian Gjiknuri, lajmëroi se në muajt në vijim do të nisë rehabilitimi i rrugëve duke shtuar se Shqipëria do të rrisë stokun e rrugëve dhe kjo kërkon volume më të mëdha të mirëmbajtjes.

“Duke filluar nga muaji prill do të kemi ndërhyrje masive për t’i sjellë rrugët në nivelet e duhura të sigurisë. Fazë e parë e këtij procesi ishte pastrimi i tabelave nga akset rrugore

Duhet të bëjmë ndërhyrje që këto akse kryesore dhe këto nyje ku ka zona të banuara të jenë të ndriçuara. Po mendojmë për shfrytëzimin e energjive të rinovueshme. Këto janë kosto që do të përfshihen në mirëmbajtje, por janë kosto të përballueshme dhe jashtëzakonisht të nevojshme për procesin e sigurisë në rrugë”, tha Gjiknuri.

Shembull i këtyre ndërhyrjeve është aksi Plepa-Rrogozhinë, për të cilën ndriçimi i rrugëve pritet të realizohet brenda 45 ditëve.

Sipas Gjiknurit, sektori i mirëmbajtjes së rrugëve është një nga elementët jashtëzakonisht të domosdoshëm më të neglizhuar ndonjëherë. Përgjegjësi për këtë neglizhencë, sipas ministrit, kanë edhe bashkitë.

“Ne do të ndryshojmë ligjin, që disa nga këto akse të ketë mundësi t’i marrë në dorë edhe qeveria. Por edhe bashkive do u shikohet pjesa buxhetore, pasi nuk mund të lihen pa investime. Bëhet fjalë jo për rrugët nacionale, por për rrugë të tjera me rëndësi nga pikëpamja kombëtare”, u shpreh ministri.

Gjiknuri paralajmëroi edhe ndryshime në sistemin e mirëmbajtjes së rrugëve, proces i cili do të vazhdojë sipas modelit të Bankës Botërore, por do të rishikohet supervizori i mirëmbajtjes, i cili të mos jetë më vetëm një për të gjithë vendin, por të ndahet në bazë të rajoneve.

Angelo Haruni/SCAN

Rehabilitimi i rrugëve – Rama: Akset rrugore që do i nënshtrohen punimeve

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.