Nga se vdesin shqiptarët? – 17% nuk dihen shkaqet, 53.5% nga sistemi i qarkullimit të gjakut, 16% nga tumoret
Sipas Eurostat, shkaku kryesor i vdekjeve në Bashkimin Europian janë sëmundjet e sistemit të qarkullimit të gjakut, më pas ndjekin tumoret dhe në vend të tretë sëmundjet e sistemit të frymëmarrjes. Po të marrim të dhënat krahasuese të institutit tonë të statistikave sa i përket shkaqeve të vdekjeve në vendin tonë, rezulton se edhe në Shqipëri, sëmundjet e sistemit të qarkullimit të gjakut janë shkaktari kryesor i vdekjeve, me 53.5% të totalit.
Kjo shifër është e ngjashme me atë të vendeve si Rumania, Letonia, Lituania apo Estonia. Por, ndryshe nga Europa, në vend të dytë si shkak i vdekjeve në vendin tonë janë simptomat apo sëmundjet e papërcaktuara. Ose më saktë, 17.45% e shqiptarëve nuk dihet se përse kanë humbur jetën. Ajo që bie tjetër në sy duke bërë një krahasim me Europën është pasha e tumoreve në shkaqet e vdekjeve të shqiptarëve. Me vetëm 16.1% të vdekjeve të atribuara ndaj tumoreve, Shqipëria është në fund të Europës bashkë me Bullgarinë.
Në Europë, Sllovenia ka rekordin e vdekjeve për shkak të tumoreve, në 32% të totalit, pra thuajse 1/3 e vdekjeve. Në vend të katrët sa i përket shkaqeve të vdekjeve në vendi tonë janë traumat apo helmimet dhe vetëm në vend të 5-të sëmundjet e sistemit të frymëmarrjes.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.