Nga vijnë rrobat që shiten në Shqipëri? Në 2017 u importuan 8.6 miliardë lekë mallra më shumë se në 2015-ën

Kërkesat e konsumatorëve shqiptarë për mallra të veshmbathjes kanë ardhur duke u rritur vit pas viti dhe kjo pasqyrohet edhe në vlerën e rritur të importeve me disa miliarda lekë vit pas viti. Vetëm për 9 muajt e parë të vitit 2017, Shqipëria ka importuar 5.3 miliardë lekë më shumë mallra nga grupi “Tekstile dhe këpucë”.

Në rang kombëtar, një familje shqiptare shpenzon gati 5% të buxhetit të saj për të blerë veshje e këpucë, ndërsa në kryeqytet kjo shifër arrin deri në 6,2% të të ardhurave.

Por nëse në Shqipëri, ushqimet, pijet apo restorantet e hotelet janë më të lira se në Europë, çmimet e veshjeve janë vetëm 4% më të ulëta se mesatarja e BE-së. Kjo mund të shpjegohet edhe me gjeografinë e importeve të këtyre grupmallrave.

Duke analizuar të dhënat e INSTAT, SCAN ka përpiluar këtë grafik ku tregohen sipas peshës në importe, tekstilet e këpucët e importuara nga secili shtet.

Si partneri tregtar më i madh i Shqipërisë, Italia renditet e para edhe në këtë listë, duke zënë 50.1% të vlerës së importeve. Tregtia në këtë fushë me shtetin përtej Adriatikut është e favorizuar edhe nga raportet ekzistuese me ndërmarrjet fasone dhe firmat italiane të veshjeve që shesin produkte në Shqipëri.

Në vend të dytë për nga vlera e importeve rendit Turqia, nga ku vlera e mallrave ka pësuar rritje me rreth 1 miliard lekë për këto 9 muaj, krahasuar me vitin e kaluar. Veshjet dhe këpucët turke zënë 18% të tregut të importit, por duke konsideruar se çmimet për artikull janë ndjeshëm më të lira se ato italiane, përqindja reale e tregut për sasi përllogaritet të jetë rreth 20-25%.

Treshen e importeve e mbyll Kina, e cila zë 13% të vlerës së tregtuar. Ashtu si në rastin e Turqisë, çmimet për njësi janë më të lira, ndaj pjesa reale në treg është më e madhe.

Ndërkohë, sa i takon vendeve të tjera për të cilat disponohen të dhëna, Greqia dhe Gjermania zënë përkatësisht 4.6% dhe 3% të vlerës së importuar në “Tekstile dhe këpucë”. Krahasuar me disa vite më parë, mallrat nga Gjermania kanë pësuar një ulje të vogël, pjesë e cila është zënë nga vendi fqinj, Greqia.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.