Ngadalësohen çmimet në Eurozonë – Inflacioni nën kërcënim, për faj të çmimeve e energjisë
Çmimet e prodhimit në fabrikat e Eurozonës u ngadalësuan lehtë gjatë muajit të parë të këtij viti, tregojnë të dhënat e fundit. Kjo rënie vjen si pasojë e performancës së çmimeve në sektorin e energjisë, thonë të dhënat e fundit të zyrës së statistikave të Bashkimit Europian. Kështu, çmimet e prodhimit në të 19 vendet që ndajnë monedhën e përbashkët u rritën me vetëm 0.4% në terma mujorë, në linjë me pritshmëritë e tregjeve dhe analistëve.
Në terma vjetorë ndërkohë rritja fiksohet në 1.5%, ndërkohë që tregjet prisnin një rritje me 1.6%. Gjatë muajit paraardhës ndërkohë, rritja fiksohej në 2.2%. Rritja bindshëm më e ngadaltë e çmimeve të energjisë ka gjeneruar të dhënat zhgënjyese.
Çmimet e prodhimit janë një indikator që reflektohen drejtpërdrejtë te çmimet e konsumit duke ndikuar për rrjedhojë edhe politikat monetare të Bankës Qendrore Europiane. Kjo e fundit vazhdon të jetë në ndjekje të një norme inflacioni pranë dhe më poshtë se 2%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.