Ngadalësohet ekonomia britanike. Prek nivelin më të ulët në 6 muaj, ndikon rivendosja e karantinës
Rimëkëmbja ekonomike e Britanisë thuajse ndaloi në Tetor, ndërkohë që rritja e rasteve me koronavirus goditi sektorin e mikpritjes, duke shtuar shanset që ekonomia të tkurret në tremujorin e fundit 2020. Të dhënat treguan humbje të vrullit, ndërkohë që autoritetet ndaluan kontaktet sociale dhe mbyllën baret dhe restorantet. Produkti i Brendshëm Bruto u rrit me 0.4% në Tetor, pas rritjes me 1.1% në Shtator, sipas zyrës së Statistikave në Londër, që është treguesi më i dobët që prej kolapsit në Prill.
Shpërndarja e limituar e vaksinës së Covid nisi këtë javë në Britani, duke ofruar shpresë për një rimëkëmbje të konsumit në vitin e ardhshëm. Megjithatë, shumë biznese do përballen me kufizime tregtare me BE, që hyjnë në fuqi më 1 Janar kur të përfundojë periudha e tranzicionit. Kryeministri Boris Johsnon dhe presidentja e Komisionit, Ursula von der Leyen, kanë ofruar kohë deri të Dielën, për të vulosur paktin e ri tregtar.
Britania ka numrin më të lartë të vdekjeve nga Covid-19, me mbi 62,000 dhe ka pësuar një nga goditjet më të mëdha ekonomike. Në tremujorin e dytë, ekonomia britanike u tkurr me 19.8%. Prodhimi në Tetor, ishte 7.9% më i ulët se në Shkurt, përpara se të godiste pandemia.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.