Ngadalësohet ekonomia franceze – Rritet me vetëm 0.3% në T1, norma më e ngadaltë në 2 vite
Rritja ekonomike e Francës është ngadalësuar lehtë në nisje të vitit, duke shtuar shanset e një ngadalësimi të përkohshëm në Eurozonë. Agjencia e Statistikave në Francë INSEE, bëri të ditur në vlerësimin fillestar se ekonomia e dytë më e madhe e Eurozonës u rrit me 0.3% në tremujorin e parë, që është norma më e ngadaltë në 2 vite. Kjo shënon një ngadalësim nga rritja me 0.7% e regjistruar në fund të 2017-ës dhe rezultoi poshtë projeksioneve të analistëve.
Ndërkohë, Austria dhe Spanja publikuan gjithashtu të dhëna poshtë projeksioneve për ekonominë gjatë periudhës. Sipas analistëve, kjo tregon se e gjithë Eurozona do të ngadalësohet në 0.4% nga 0.7% rritje në tremujorin e fundit 2017. Treguesi i ndjesisë mbi ekonominë i Komisionit Europian dha pak siguri se ngadalësimi i mundshëm pritet të jetë i përkohshëm, pasi bizneset dhe manaxherët e anketuar, treguan një përmirësim të humorit.
Ministri francez i Financave, Bruno Le Maire tha se ngadalësimi i Francës, i nxitur nga investimet e dobëta të biznesit dhe rënia e eksporteve përballë euros së fortë, nuk ishte surprizë, ndërkohë që fundi i 2017-ës tregoi performancë fantastike. Shpenzimet e konsumit, që ka qenë motori i rritjes së ekonomisë franceze, u rritën me vetëm 0.2% në tremujorin e parë, pavarësisht rritjes së konsumit të energjisë në një kohë të motit të jashtëzakonshëm.
Investimet e bizneseve u ngadalësuan në 0.5% nga 1.6% që ishin në fundin e 2017-ës, ndërsa prodhimi total i mallrave dhe shërbimeve u ngadalësua në 0.3% nga 0.9%. Për rrjedhojë, eksportet ranë lehtë në tremujorin e parë 2018, nga rritja e fortë e periudhës së kaluar.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.