“Ngadalësohet” Franca – Rritja zbret në 0.3% në T1, shkak konsumi dhe eksportet
Ekonomia franceze u rrit nën pritshmëritë gjatë tremujorit të parë të këtij viti duke regjistruar një normë pranë 0.3%. Performanca e dobët merr shtysë nga shpenzimet konsumatore nën pritshmëritë, që kanë zbehur rimëkëmbejn e investimeve të biznesit, tregojnë të dhënat paraprake të publikuara nga Instituti i Statistikave në vend.
Norma prej 0.3% shënon një ngadalësim të hapit të rritjes së ekonomisë, nga 0.5% që shënonte në tremujorin e fundit të vitit të kaluar. Projeksionet për tremujorin e parë të vitit ndërkohë, flisnin për një normë rritje pranë 0.4%.
Rritja e shpenzimeve konsumatore u ngadalësua në vetëm 0.1% gjatë së njëjtës periudhë kohore, pasi rritej me 0.6% gjatë tre muajve të fundit të vitit të kaluar. Shpenzimet anemike në energji, si pasojë e motit të ngrohtë të pazakontë për stinën kanë nxitur këtë ecuri.
Konsumi privat kontribuoi me 0.4% në rritjen ekonomike gjatë tremujorit të parë, dhe investimet e biznesit me 0.6%, ndërkohë që tregtia e jashtme, si pasojë e eksporteve të dobëta, “fshiu” 0.7% të rritjes ekonomike.
Roel Kokruti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.