Ngadalësohet industria gjermane – Të dhënat sugjerojnë recesion të butë për ekonominë
Industria në ekonominë më të madhe në Europë mori një tjetër goditje në Korrik, duke shtuar më tej shqetësimet për rënien e fitimeve të korporatave.
Indeksi PMI i Markit ra në 43.1 pikë nga 45 pikë që ishte muajin paraardhës, dhe njëkohësisht është niveli më i ulët në shtatë vitet e fundit. Të dhënat ishte poshtë parashikimeve të analistëve dhe sugjerojnë një kontraktim të sektorit, që do të thotë se mundësitë për një recesion në Gjermani vijojnë të rriten. Euro humbi pikë përballë dollarit amerikan pas publikimit të të dhënave, duke u tregtuar pranë 1.1130 dollarëve.
Raporti është një goditje tjetër për ekonominë gjermane dhe dobësia ka qenë më e theksuar në sektorin e automjeteve. Kompanitë si Continental apo Daimler po ndjejnë goditjet nga dobësimi i kërkesës globale dhe nga tranzicioni drejt automjeteve elektrike. Por, ka shenja rreziku edhe në sektorë të tjerë, me gjigantin gjerman të kimikateve, BASF që paralajmëroi për rënien e fitimeve. Për më tepër, një tjetër rrezik vjen nga moti i nxehtë dhe mungesa e reshjeve, që mund të kufizojnë trafikun e anijeve në lumin Rhine, një arterie kyçe për biznesin.
Të dhënat shtojnë më tej presionin ndaj Bankës Qendrore Europiane që të ofrojë stimuj shtesë. Gjithashtu, ka pasur shenja shqetësuese edhe për prodhimin në Francë, pasi indeksi shënoi rënie gjatë korrikut dhe sugjeron për një stanjacion të ekonomisë. Ndërsa indeksi që mat të gjithë industrinë e Eurozonës ra në nivelin më të ulët në 6 vitet e fundit.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.