Ngadalësohet konsumi në Britani – Moti i ftohtë mban konsumatorët në shtëpi, bien shitjet me pakicë

Konsumatorët britanikë kanë bërë “pushim” gjatë Marsit  për shkak të motit të ftohtë, gjë që solli në rënien më të madhe  të shitjeve me pakicë në 1 vit. Moti i pazakontë ka shkaktuar rënien e volumit të shitjeve me 1.2% nga muaji i kaluar, raporton Zyra Kombëtare e Statistikave.

Për tremujorin e plotë, shitjet ranë me 0.5% krahasuar me tremujorin e fundit të 2017-ës. Sipas zyrës së Statistikave në Londër, kjo me shumë gjasa do t’i heqë rritjes së Produktit të Brendshëm Bruto për tremujorin e parë 0.03%.

Paundi ra në nivelin më të ulët në 1 javë pas publikimit të të dhënave. Të dhëna të tjera këtë javë treguan se rritja e pagave është frenuar dhe inflacioni ra më shpejtë se ç’pritej, duke ngritur dyshime te ndërhyrja e Bankës së Anglisë këtë vit.

Megjithatë, pak ekonomistë kanë hequr shpresat se institucioni nuk do të rrisë normën bazë të interesit në muajin që vjen.

Banka e Anglisë deklaroi muajin e kaluar se pret që moti i pazakontë të ngadalësojë në mënyrë të përkohshme ekonominë, por shtoi se nuk do të ndikojë në perspektivën e tkurrjes monetare.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.