Ngadalësohet konsumi në Eurozonë – Shitjet me pakicë rriten me vetëm 0.1% gjatë Marsit 

Shitjet me pakicë në 19 vendet e valutës së përbashkët janë ngadalësuar ndjeshëm gjatë muajit Mars, ndërkohë që konsumatorët kanë shpenzuar më pak në produktet jo-ushqimore, krahasuar me Shkurtin.

Zyra e Statistikave e Bashkimit Europian, Eurostat, bëri të ditur se shitjet me pakicë  u rritën me vetëm 0.1% në Mars,  nga 0.3% rritje gjatë Shkurtit.

Analistët ndërkohë prisnin një rritje me 0.5%. Ndërkohë që luhatshmëria i kthen shitjet me pakicë në një tregues të pabesueshëm, rënia vjen paralelisht me ngadalësimin e ekonomisë së Eurozonës.

Rënia e shitjeve me pakicë erdhi kryesisht prej rënies së shpenzimeve në produktet jo-ushqimore, kryesisht veshje dhe mallra farmaceutikë.

Shpenzimet në ushqim dhe pije u rritën lehtë, ndërsa porositë dhe blerjet online treguan një rritje me 3.3%.

Ndër vendet anëtare, shitjet me pakicë, që janë tregues i konsumit, patën rënien më të madhe në Irlandë dhe Gjermani, ndërsa Letonia, Portugalia dhe Austria treguan rritje të madhe në Mars.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.