Ngadalësohet Zvicra – Ekonomia rritet me normën më të ulët që prej fundit të 2009-ës
Ekonomia e Zvicrës u rrit me normën më të ngadaltë në thuajse 8 vite për tremujorin e dytë, tregojnë të dhënat Qeveritare, për shkak të shpenzimeve të ulëta publike dhe tregtisë së dobët.
Me bazë vjetore, rritja e Produktit të Brendshëm Bruto u përgjysmua në 0.3%, nga 0.6% që ishte në tremujorin e parë. Kjo ishte poshtë projeksioneve të analistëve prej 1.1% dhe shënoi normën më të ngadaltë të rritjes që prej fundit të 2009-ës.
Sipas Sekretariatit Shtetëror për Çështjet Ekonomike (SECO), sektori financiar, fabrikat dhe industria e hoteleve i ka dhënë një nxitje ekonomisë, ndërsa zhvillimet në tregti, administratën publike dhe sektorin e shëndetësisë mbetën pas.
Bilanci tregtar i Zvicrës u tkurr në tremujorin e dytë, duke limituar rritjen e ekonomisë, pasi përbën për rreth 2/3-tat e aktivitetit ekonomik.
Ndërkohë që eksportet e mallrave u rritën lehtë, eksportet e shërbimeve si patentat dhe licencat patën rënie. Importet nga ana tjetër u rritën ndjeshëm, nxitur nga produktet farmaceutike dhe kimikatet.
Në muajin Qershor, Qeveria e Zvicrës uli projeksionet për rritjen ekonomike në vitin 2017, në 1.4% nga 1.6%. Ministria e Ekonomisë do të japë projeksionet e reja për rritjen vjetore të Produktit të Brendshëm Bruto më datë 21 Shtator.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.