“Ngecin” pensionet e emigrantëve, Hado: Arsyet pse jemi në vend numëro me Greqinë dhe Italinë

Për emigrantët shqiptarë që jetojnë dhe punojnë në Itali dhe Greqi, nuk është bërë asnjë hap përpara për njohjen e pensioneve, gjë që i bën ata të humbasin periudhat kontributeve në Shqipëri.

I pranishëm në Komisionin Parlamentar të Shëndetësisë, Drejtori i Institutit të Sigurimeve Shoqërore, Astrit Hado, duke iu përgjigjur interesit të deputetëve, theksoi se situata është në vend numëro, pasi ka mungesë dëshire nga ana e këtyre dy shteteve.

Në Itali regjistrohen mbi 500 mijë emigrantë, prej të cilëve gjysma janë të punësuar, ndërsa në Greqi janë rreth 440 mijë emigrantë.

Hado ka sqaruar gjithashtu se këtu nuk bëhet fjalë për kosto financiare, por për shkak të mungesës së vullnetit politik dhe marrëdhënieve që kanë këto dy vende me vendet e botës së tretë.

Komisioni i Shëndetësisë miratoi marrëveshjen për njohjen e kontributeve midis Shqipërisë dhe Austrisë, ku përfitues do të jenë rreth 2 mijë shtetas shqiptarë që jetojnë atje.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.