“Ngjyroset” fasada përgjatë lumit Drin në Lezhë! Hapet tenderi 224 milionë lekë

Fondi Shqiptar i Zhvillimit ka hapur tenderin për rikonstruksionin e Fasadave të objekteve përgjatë Lumit Drin në qytetin e Lezhës, Blloku Nr.1 dhe Rruga Lalm i ri, Naim Frashëri. Tenderi ka fond limit 224 milionë e 780 mijë lekë dhe afati për dorëzimin e ofertave është data 30 tetor 2020.

“Ndërhyrja e propozuar parashikon unifikimin e mbulesave të objekteve, duke realizuar çati me strukturë druri/metalike, dhe veshje me tjegulla vendi ngjyre gri e errët. Në fasadat e objekteve do të aplikohet sistemi kapot dhe lyerja e tyre me bojë me bazë plastike me disa tonalitete.

Teksturat e aplikuara do të synojnë krijimin e një kompozimi dinamik duke i dhënë një imazh të ri objekteve por edhe vetë portës hyrëse të qytetit. Hapësira e brendshme e bllokut do të rikonceptohet me një organizim të ri.

Në pjesën qendore me një sipërfaqe prej 800m² do të pozicionohet hapësira e parkut, e trajtuar në disa zona me gjelbërim, stola dhe sheshe lojërash për fëmijë. Kjo hapësirë do të trajtohet dhe kompozohet me disa lloje materialesh, sipërfaqe tartani, sipërfaqe betoni dhe pjesë te vecanta te trajtuara me zhavorr.

Përreth sheshit qëndror përgjatë objekteve do të pozicionohet rruga qarkulluese për automjetet, të cilat do të parkohen në dy hapësirat e parashikuara për to në dy skajet fundore të bllokut” shkruhet në dokumentet e tenderit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.