Ngrihet Qendra e NATO-s për Studimin e Fenomenit të Luftëtarëve të Huaj. Si funksionon e si financohet struktura në Tiranë
Në Shqipëri do të ngrihet Qendra e Ekselencës së NATO-s për Studimin e Fenomenit të Luftëtarëve të Huaj (NATO Center of Excellence for Foreign Fighters), e paralajmëruar më herët nga Ministrja e Mbrojtjes Mimi Kodheli. Kjo qendër do të financohet nga buxheti i Ministrisë së Mbrojtjes e do të ushtrojë aktivitetin brenda garnizonit “Skënderbej. Vendimi i publikuar në Fletoren Zyrtare parashikon se “Ministria e Mbrojtjes siguron pajisjet dhe të gjithë mbështetjen logjistike të nevojshme për ushtrimin e veprimtarisë dhe për funksionimin e qendrës”. Qendra e Ekselencës së NATO-s për Studimin e Fenomenit të Luftëtarëve të Huaj është institucion qendror, në varësi të ministrit të Mbrojtjes, dhe ka personalitet juridik publik.
“Misioni i Qendrës së Ekselencës së NATO-s për Studimin e Fenomenit të Luftëtarëve të Huaj, në Shqipëri, është kontributi në fushën studimore dhe edukuese për informimin e vendimmarrësve, në nivel kombëtar, dhe përgatitjen e punonjësve civilë e ushtarakë të agjencive të inteligjencës, ato të zbatimit të ligjit dhe personelit që angazhohet në operacionet ushtarake të drejtuara nga NATO-ja për fenomenin e angazhimit të luftëtarëve të huaj në konfliktet aktuale dhe ato të ardhshme në rajon e më gjerë. Kjo qendër ekselence do të kontribuojë në njohjen, parandalimin dhe reduktimin e mundshëm të këtij fenomeni si dhe në rritjen e nivelit të përgatitjes së Forcave të Armatosura të Republikës së Shqipërisë dhe atyre të NATO-s në luftën kundër këtij fenomeni në operacionet ku ato janë të angazhuara” shkruhet në vendimin që mban datën 3 shkurt dhe që tashmë ka marrë fuqi ligjore.
Funksionet administrative që do të kryejë Qendra e Ekselencës së NATO-s për Studimin e Fenomenit të Luftëtarëve të Huaj, në Shqipëri, janë:
– Kontributi në fushën studimore dhe edukuese për informimin e vendimmarrësve në nivel kombëtar;
– Përgatitja e punonjësve civilë dhe ushtarakë të agjencive të inteligjencës, agjencive të zbatimit të ligjit dhe personelit që angazhohet në operacionet ushtarake, të drejtuara nga NATO-ja, për fenomenin e angazhimit të luftëtarëve të huaj në konfliktet aktuale dhe ato të ardhshme në rajon e më gjerë;
– Kontributi për njohjen, parandalimin dhe reduktimin e mundshëm të këtij fenomeni;
– Kontributi për rritjen e nivelit të përgatitjes së Forcave të Armatosura të Republikës së Shqipërisë dhe atyre të NATO-s në luftën kundër këtij fenomeni, në operacionet ku ato janë të angazhuara;
– Koordinimi i të gjithë procesit dhe ndjekja e procedurave për akreditimin e qendrës;
– Përgatitja e projektakteve të nevojshme për plotësimin e të gjithë kuadrit ligjor;
– Hartimi dhe negocimi i memorandumeve të mirëkuptimit, memorandumeve operacionale dhe funksionale, marrëveshjeve teknike, për funksionimin e qendrës dhe anëtarësimin në të të vendeve të tjera aleate/partnere.
Struktura dhe organika e Qendrës së Ekselencës së NATO-s për Studimin e Fenomenit të Luftëtarëve të Huaj, në Shqipëri, miratohet nga Kryeministri ndërsa personeli do të jetë ushtarak dhe civil. Marrëdhëniet e punës të personelit civil do të rregullohen në përputhje me dispozitat e Kodit të Punës të Republikës së Shqipërisë.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.