“Ngrin” tregu i pasurive të paluajtshme/ Agjentët nuk përfitojnë as pagën minimale nga qeveria

Masat e marra për frenimin e përhapjes së COVID-19 kanë dëmtuar rëndë edhe tregun e pasurive të paluajtshme. TV SCAN ka pyetur disa agjenci imobiliare që operojnë në kryeqytet por edhe jashtë tij, të cilat shprehen se gjatë kësaj periudhe të gjitha transaksionet dhe qiradhëniet kanë stopuar për shkak se edhe nuk ka interes nga ana e qytetarëve të cilët janë të kufizuar në lëvizje, si dhe nuk mund të bëhet shoqërimi i tyre edhe në ato raste ku transaksionet apo kërkesat kanë qenë në proces.

Ekspertja e tregut imobiliar, Ilda Zaloshnja, shprehet se pasojat do të vijojnë edhe pasi të kapërcehet kjo periudhë.

Por pavarësisht dëmeve, agjentët immobiliarë janë të përjashtuar nga mbështetja financiare e qeverisë për shkak se janë në listën e aktiviteteve të hapura, por që në praktikë nuk punojnë.

Kjo situatë ka bërë që qytetarët dhe agjencitë gjatë kësaj periudhe të mos përfitojnë edhe nga amnistia për rivlerësimin e pasurive me 3 për qind, masë e cila pritej t’i jepte një hov tregut të pronës në vend dhe të rriste shitjet.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.