Ngritja e bursës së energjisë – Hapet tenderi për krijimin e platformës elektronike, fondi limit 225 mln lekë

Pavarësisht se institucionet kanë deklaruar se bursa e energjisë do të ishte funksionale brenda 3-mujorit të parë të këtij viti, tenderi për ngritjen e Platfomës Elektronike të Tregtimit për Tregun e Ditës në Avancë dhe atë Brenda Ditës, sapo është hapur. Fondi limit i vënë në dispozicion është 225 mln lekë, ndërkohë që kompanitë e interesuara do të kenë afat deri në datë 4 maj për të dorëzuar ofertat e tyre.

Hapja e tenderit vjen pas përzgjedhjes së aksionerëve të bursës, ku përfshihen operatorët e sistemit të transmetimit në Shqipëri dhe Kosovë, ndërkohë që sipas dokumenteve që shoqërojnë procedurëne prokurimit public, theksohet se këto 2 vende bien dakort të themelojnë një treg të përbashkët të energjisë elektrike, bazuar në modelin operacional të një Burse të Energjisë Elektrike (PX) për të dyja zonat e kontrollit, duke përdorur një algoritëm të përcaktimit të ҫmimit, skedulimit dhe flukset, të realizuara njëherësh si një proces i integruar i kryer nga bursa (ALPEX). Në zbatim të detyrimeve të Traktatit të Komunitetit të Energjisë, Shqipëria dhe Kosova janë zotuar të zbatojnë Paketën e Tretë të Energjisë të Komunitetit të Energjisë, e cila udhëzon palët në lidhje me krijimin dhe funksionimin e një tregu konkurues të energjisë elektrike.

Si rrjedhojë, modelet e tregut në të dyja vendet parashikojnë që nëpërmjet ALPEX të zbatohet Modeli i Synuar Europian i Tregut, për tregjet e ditës në avancë (DAM) dhe brenda ditës (IDM), të karakterizuara ndryshe dhe si tregje me shumicë, bazuar në transaksionet dypaleshë dhe kontratat e lidhura midis dy pjesmarrësve të tregut jashtë bursës së energjisë elektrike. Sipas dokumenteve të tenderit, volumet e transaksioneve në këtë bursë. janë vendimtare për funksionimin e tregjeve të ditës në avancë dhe Brenda ditës.

Ndaj, si rrjedhojë, të 2 vendet janë zotuar të detyrojnë palët dominuese në tregjet e tyre të energjisë elektrike që të tregtojnë pjesë të energjisë së shitur ose të blerë, nëpërmjet bursës. Fillimisht tregu i ditës në avancë dhe Brenda ditës do të krijohet me minimalisht dy zona kontrolli, që janë Shqipëria dhe Kosova, duke zbatuar në të ardhmen projekte për bashkimin me tregje të tjera potenciale.  Ndërkaq, ALPEX do fillojë me operimin e ditës në avancë në Shqipëri, dhe më pas, brenda një periudhë dy mujore do të operojë me bashkimin e këtij tregu më Kosovën.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.