Ngrohja në dimër: Më shumë se gjysma e shqiptarëve përdorin drutë!
Më shumë se gjysma e familjeve ngrohen ende me dru zjarri. Të dhënat e Institutit të Statistikave tregojnë se, veçanërisht në zonat rurale dhe në qarqet më të varfra të vendit, përqindja e familjeve që përdorin drutë e zjarrit është shumë e lartë.
Gjatë vitit 2018, 50.3% e familjeve deklaruan për Instat se ngrohen me dru zjarri, por, në qarqe të veçanta, ky raport është edhe mbi nivelin 90%. Përqindjen më të lartë të familjeve që përdorin drurin për t’u ngrohur e ka qarku i Korçës, me mbi 96%, i ndjekur nga Korça, me 90% dhe nga Dibra me 89%.
Në këto qarqe, ku dimri përgjithësisht është edhe më i ashpër, në pjesën dërrmuese banorët vazhdojnë të mbështeten në formën më të vjetër dhe më tradicionale të ngrohjes.
Përdorimi i druve është një alternativë më e lirë ngrohjeje, sidomos në zonat rurale ku banorët kanë akses të drejtpërdrejtë në lëndën drusore, pa patur nevojë ta blejnë atë. As vendosja e moratoriumit për prerjen e pyjeve nuk duket të ketë ndikuar shumë për të ulur përdorimin e druve të zjarrit për ngrohje.
Në përqindje më të ulëta, kjo është forma mbizotëruese e ngrohjes në dimër edhe për banorët e Shkodrës, Lezhës, Elbasanit, Fierit, Beratit dhe Gjirokastrës.
Energjia elektrike është burimi kryesor i ngrohjes në vetëm dy qarqe të vendit, atë të Vlorës, me 68% dhe atë të Tiranës, me rreth 63%. Kjo mund të jetë e lidhur me nivelin më të lartë të të ardhurave, por edhe me një peshë më të lartë të popullsisë urbane.
Ndërkohë, qarku i Durrësit është i vetmi ku burimi kryesor i përdorur për ngrohje është gazi, me 37.5% të familjeve, me një epërsi të lehtë ndaj energjisë elektrike.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.