Nikolin Jaka thirrje kryeministrit Rama – “Në mandatin e tretë duhet një ministri e fuqishme ekonomie dhe sipërmarrje”
Mandati i tretë i qeverisë Rama duhet të ketë fokus kryesor dhe mbi gjithë të tjerat rritjen dhe zhvillimin ekonomik. Kështu shprehet kreu i Dhomës së Tregtisë dhe Industrisë Durrës, Nikolin Jaka. Ndarja e ministrisë së Financave dhe Ekonomisë në dy dikastere si dhe fuqizimin e komponentit që mbështet dhe bashkëpunon me sipërmarrjen janë kërkesat kryesore që Jaka i ka drejtuar kryeministrit Rama.
Një ministri të Financave si dhe një tjetër të Ekonomisë dhe Sipërmarrjes janë mënyra më e mirë për të ushqyer rritjen dhe zhvillimin ekonomik e Shqipërisë. Kjo është thirrja që Kreu i Dhomës së Tregtisë dhe Industrisë i drejton kryeministrit Rama lidhur me konfigurimin e mundshëm të mandatit të tretë qeverisës.
“Është një thirrje për kryeministrin që në formatimin e qeverisë të ruaj një vend me peshën e duhur për Ministrinë e Ekonomisë , zhvillimit ekonomik dhe sipërmarrjes private. Nuk mundet që të kemi një ministri për mbrojtjen e biznesit një ministër pa portofol dhe nga ana tjetër nuk mund të kemi një Ministri Financash ku është edhe shkopi edhe karrota në të njëjtin vend. Është nevojë emergjente sidomos në mandatin e tretë të qeverisjes ku fokusi duhet të jetë ekonomia dhe nevoja emergjente është krijimi i dialogut të sinqertë dhe dialogut të prekshëm për sipërmarrjen private, pra një dialog i hapur publik privat, grupet e interesit, krijimi i strukturave këshilluese dhe implementuese për reformat ekonomike si dhe krijimi i ministrisë së ekonomisë, zhvillimit ekonomi dhe sipërmarrjes private”, u shpreh Nikolin Jaka.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.