Nis detyrën në Shqipëri, kush është ambasadori i ri i Austrisë që karrierën diplomatike e nisi nga Tirana 23 vite më parë!

Kryetari i Kuvendit, Gramoz Ruçi, priti Ambasadorin e ri të Austrisë,  Christian Steiner, me rastin e fillimit të mandatit të tij në Shqipëri.  Kryetari Ruçi e uroi Ambasadorin Steiner për detyrën e tij të re dhe shprehu besimin se gjatë këtij mandati marrëdhëniet midis të dy vendeve do të fuqizohen më tej.

“Austria është një partner i rëndësishëm i Shqipërisë. Midis të dy vendeve kemi marrëdhënie dhe një bashkëpunim të shkëlqyer politik. Ne i  jemi mirënjohës Austrisë për mbështetjen e  fuqishme për integrimin europian të Shqipërisë dhe Ballkanit Perëndimor  dhe besojmë se kjo mbështetje do të vazhdojë edhe në të ardhmen,” nënvizoi Kryetari Ruçi.

Ambasadori Christian Steiner falenderoi Kryetarin e Kuvendit,  Gramoz Ruçi, për pritjen e ngrohtë dhe vlerësimin e  lartë të bashkëpunimit me Austrinë dhe vuri në dukje se të njejtat vlerësime ndan edhe pala austriake. “Është hera e dytë që vij me detyrë në Shqipëri dhe gjeta një Shqipëri tjetër. Austria do të vazhdojë të mbështesë çeljen e negociatave dhe rrugëtimin europian të Shqipërisë. Pa Shqipërinë dhe Ballkanin Perëndimor në BE, Europa është e paplotë,” theksoi Ambasadori Steiner.

Kryetari Ruçi dhe Ambasadori Steiner biseduan edhe mbi zgjerimin e bashkëpunimit parlamentar dhe bashkëpunimit në fushat të tjera të ekonomisë, arsimit, kulturës, sigurisë etj.

Dr. Christian Steiner nga fundi i vitit 2016 deri në pranverën e vitit 2019, ai ka drejtuar Sekretariatin Ekzekutiv të Presidencës Austriake të BE-së për vitin 2018 në Vjenë. Në misionet diplomatike jashtë vendit, ai ka qënë zv. Ambasador i Ambasadave Austriake në Damask, Ankara dhe Pekin.

Në Ministrinë Federale të Rep. së Austrisë për Evropën, Integrimin dhe Punët e Jashtme ai ka mbajtur disa funksione në departamentet përgjegjëse për çështjet e BE-së, ndër të tjera, në vitet 2013 – 2016 si Drejtor i Njësisë së Buxhetit, Financave dhe Çështjeve Monetare të BE-së dhe në vitet 2003 – 2004 si Drejtor i Njësisë për marrëdhëniet e BE-së me Shtetet e Ballkanit Perëndimor.

Karriera e tij diplomatike filloi si atashe në Ambasadën Austriake Tiranë në vitet 1996 – 1997. Christian Steiner ka studiuar Shkenca Ekonomike dhe Sociale në Universitetin e Ekonomik të Vjenës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.