Nis detyrën në Shqipëri- Kush është ambasadorja e re e Greqisë në Tiranë. Karriera nga Uashingtoni në Departamentin e Drejtësisë
Kryetari i Kuvendit, Gramoz Ruçi, priti Ambasadoren e Greqisë, Sophia Philippidou, me rastin e fillimit të misionit të saj në Shqipëri.
Pasi e uroi për detyrën e re, Kryetari Ruci i shprehu Ambasadores Philippidou gadishmërinë e Kuvendit të Shqipërisë për të bashkëpunuar me Ambasadën në Tiranë për zgjerimin e bashkëpunimit midis të dy vendeve.
“Gjatë takimit u vu në dukje se marrëdhëniet midis Shqipërisë dhe Greqisë janë marrëdhënie mes fqinjësh të mirë, partnerësh strategjikë e aleatë në NATO, të cilët ndajnë histori dhe tradita të hershme.
Takimi i Kryeministrit Edi Rama me Kryeministrin Qirjakos Micotaqis, hapën rrugën për zgjerimin dhe forcimin e bashkëpunimit dypalësh. Kryetari i Kuvendit Gramoz Ruçi, shprehu mirënjohjen për mbeshtetjen e Greqisë për hapjen e negociatave dhe besimin se kjo mbështetje do të vazhdojë” njofton Kuvendi.
Ambasadorja Sophia Philippidou falenderoi Kryetarin e Kuvendit për vlerësimin e bashkëpunimit midis të dy vendeve dhe shprehu angazhimin e qeverisë së Greqisë për të punuar për zgjerimin dhe fuqizimin e këtij bashkëpunimi.
“Unë jam e angazhuar për nxitjen e kontakteve midis të dy vendeve dhe avancimin hap pas hapi të bashkëpunimit politik, ekonomik dhe në aspekte të tjera.”, theksoi Ambasadorja Philippidou.
Sophia Philippidou është një diplomate karriere e Greqisë. Ajo ka mbajtur detyrën e zëvëndësdrejtores në Departamentin e Drejtësisë dhe Punëve të Brendshme në Ministrinë e Jashtme.
Po ashtu, ajo ka shërbyer në Kombet e Bashkuara dhe ka qenë pjesë e misionit diplomatik të Greqisë në Uashington. Ajo ka studiuar në “London School of Economics and Political Science” dhe në Universitetin e Athinës për shkenca politike.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.