Nis heqja e licencave për impiantet eolike – ERE: Janë licencuar që në vitin 2008, por s’ka asnjë impiant të ndërtuar 

Enti Rregullator i Energjisë ka revokuar licencën për prodhimin e energjisë nga era për shoqërinë “Alb Wind Energy”,që ishte licencuar qysh në janar të vitit 2008, por nuk ka plotësuar kushtet duke mos vënë në funksion impiantet.  Kjo është një nga 6 kompani të licencuara për këtë aktivitet në të njëjtin vit, ndërkohë që deri më tani edhe kompanitë e tjera nuk kanë avancuar në zbatimin e projekteve, duke bërë që potenciali i prodhimit të energjisë nga era të mbetet i pashfrytëzuar në vendin tonë.

Vonesat në ndërtimin e këtyre impianteve, detyruan Entin Rregullator të Energjisë të ndërmerrte një proces monitorimi në fund të vitit 2019, por situate e krijuar nga COVID-19 e shtyu disa herë. Ai kishte në fokus mbikëqyrjen e plotësimit të kushteve të vendimeve të licencimit për shoqëritë që do të prodhojnë energjie elektrike nga centralet eolike, duke synuar evidentimin e shkaqeve që kishin çuar këto kompani të mos përmbushnin detyrimet.   Ndërkohë që, me përfundimin e procesit do të vendosej  nëse do të kishte shtyrje apo jo e afateve për plotësimin e secilës prej kushteve të këtyre licencave nga subjektet respektive.

Ndërkaq, në vendimin e fundit, ku është vendosur revokimi i njërës prej lejeve, ERE citon edhe qëndrimin e Ministrisë së Infrastrukturës dhe Energjisë, që nuk është dakord me shtyrjen e afatit, duke theksuar se kjo mund të binte në kundërshtim edhe me strategjinë e këtij dikasteri për zhvillimin e procedurave konkurruese për ndërtimin e këtyre objekteve gjeneruese të cilët kanë mundësinë e marrjes pjesë në ankandin që do të zhvillohet. Ndërtimi i impianteve të prodhimit ët energjisë nga era ka një rëndësi të veçantë të drejtim të diversifikimit të burimeve të prodhimit të energjisë, duke qenë se vendi ynë vazhdon të dominohet nga burimet ujore, çka në periudha thatësirash pasohet me fatura tejet të larta për importin e energjisë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.