Nis konstituimi i SPAK – Prokuroria e Posaçme me 15 anëtarë, KLP çel garën për kandidatët
Paraditen e së hënës është hedhur hapi i parë për konstituimin Strukturës së Posaçme Antikorrupsion, e njohur si SPAK, e cila do të hetojë zyrtarët e lartë e pasuritë e tyre. Këshilli i Lartë i Prokurorisë vendosi që kjo strukturë të nisë fillimisht punën me 15 anëtarë, të cilët do të paraqesin kandidaturat brenda 30 ditësh, ndërkohë që do t’i nënshtrohen me përparësi procesit të Vetting-ut.
Anëtarët e KLP rrëzuan një propozim të dytë, sipas të cilit SPAK të përbëhej nga 20 prokurorë të posaçëm, me argumentin se numri i tyre mund të rritej në vijim. Kjo strukturë pritet të ketë një volum shumë të madh pune duke parë se do marrë indicie nga shumë burime për të hetuar pasuritë e zyrtarëve të lartë apo denoncimet për lidhjet e tyre të dyshimta.
Gjithsesi, KLP është ende në hapat ë parë të kryerjes së misionit të tij, duke qenë se nuk është plotësuar ende as me administratën përkatëse. Shkak për të cilin anëtarët e saj vendosën që 6 kandidatët për prokurorë që sapo kanë përfunduar Shkollën e Magjistraturës të asistojnë pranë Këshillit deri në emërimin si prokurorë.
Prokuroria e Posaçme Antikorrupsion do ketë detyrë ndjekjen penale kundër korrupsionit dhe krimit të organizuar në emër të shtetit para Gjykatës së Shkallës së Parë, Gjykatës së Apelit dhe Gjykatës së Lartë.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.