Nis ngritja e KLGJ dhe KLP – Përfundon Vetting-u për kandidatët, gati konstituimi i organeve

Të gjithë kandidatët për Këshillin e Lartë Gjyqësor dhe atij të Prokurorisë kanë kaluar tashmë në procesin e Vetting-ut duke i dhënë udhë zyrtarisht procesit të konstituimit të këtyre dy organeve kyç të sistemit të drejtësisë.

Besnik Cani, kandidat për Këshillin e Lartë të Prokurorisë ka qenë i fundit ndër magjistratët të cilët duhet të kalonin në sitën e vetting-ut për të plotësuar kuotat për këto dy organe. Ligji parashikon që brenda tre ditësh Komisioni i Pavarur i Kualifikimit duhet ti përcjellë dy listat e magjistratëve përkatësisht në Prokurorinë e Përgjithshme dhe Gjykatën e Lartë.

Këto  të dyja, brenda tre ditësh duhet të njoftojnë përkatësish mbledhjen e përgjithshme të prokurorëve dhe të gjyqtarëve,  nga do zgjidhen përfaqësuesit përkatës. Prokuroria e Përgjithshme e shpalli menjëherë datën e mbledhjes së përgjithshme, që do zhvillohet më 11 dhjetor, ndërkohë që ditët në vijim pritet që këtë ta bëjë edhe Gjykata e Lartë.

Të dy Këshillat, përbëhen nga 11 anëtarë, nga të cilët 5 vijnë nga jashtë sistemit, ndërsa 6 anëtarët e tjetër përzgjidhen sipas ndarjes në shkallë të gjykatave dhe prokurorive: 3 nga ato të Shkallës së Parë, 2 nga Apeli, ku të paktën njëri duhet të jetë nga organet që veprojnë në rrethe, dhe 1 nga Prokuroria e Përgjithshme në rastin e KLP-ës dhe 1 nga Gjykata e Lartë në rastin e KLGJ-së.

Konstitiumi i dy Këshillave do i hapë rrugë zgjedhjes së Prokurorit të Përgjithshëm, plotësimit të vakancave në Gjykatën e Lartë, ashtu si dhe ngritjes së dy organeve kyç të drejtësisë: Prokurorisë së Posaçme, e njohur si SPAK dhe Byrosë Kombëtare të hetimit.

Të dy këto organe, ngritja e të cilëve është parashikuar në pranverën e ardhshme,  janë projektuar të kenë një rol kyç në skanimin e politikanëve e zyrtarëve të lartë ashtu si dhe të krimit të organizuar në të ardhmen.

Gjithsesi, disa analistë thonë se gjithë procesi mund të pësojë ndalime apo kthime pas, pasi disa prej magjistratëve që kanë kaluar Vetting-un e do të zgjidhen në organet e reja të drejtësisë,  mund të shkarkohen nga Kolegji i Posaçëm i Apelimit,  çka do sillte rinisjen e proceseve për plotësimin e vakancave.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.