Nis punën Byroja Kombëtare e Hetimit – Hajnaj merr detyrën, Ambasada Amerikane: Gur kilometrik në drejtësinë e re
1 shtatori përkon me nisjen zyrtarisht të punës së Byrosë Kombëtare të Hetimit, organi që do hetojë për llogari të SPAK dosjet e korrupsionit e krimit të organizuar. Aida Hajnaj, e cila u përzgjodh pak javë më parë si kreu I këtij institucioni, nga e marta, ka marrë zyrtarisht drejtimit e BKH, fakt që u përshëndet menjëherë nga Ambasada e Shteteve të Bashkuara në Tiranë.
Përmes një postimi në faqen zyrtare të saj në rrjetin “Facebbok”, Ambasada e quan një gur kilometrik nisjes e punës së Byrosë, për t’u siguruar shqiptarëve drejtësinë që meritojnë.
“Sot, zj. Aida Hajnaj, merr detyrën si drejtuesja e parë e Byrosë Kombëtare të Hetimit. Ky është një gur i rëndësishëm kilometrik, jo vetëm për sistemin shqiptar të drejtësisë, por gjithashtu për gratë në role drejtuese. Në përputhje me kërkesat e ligjit shqiptar, Hajnaj përfundoi një program trajnimi posaçërisht të krijuar nga Programi Ndërkombëtar i Ndihmës së Trajnimit të Hetimit Kriminal (ICITAP) në Shqipëri, të fokusuar në procesin përzgjedhës të hetuesve të BKH, në etikën profesionale në BKH, në procedurat e disiplinës në BKH, në përdorimin e forcës dhe armëve të zjarrit nga BKH, rregulloren mbi përdorimin e poligrafit në BKH, në marrëdhëniet e BKH me Policinë e Shtetit dhe mbi rolin vëzhgues të Komisionit Ndërkombëtar të BKH. Ne përgëzojmë Shqipërinë për marrjen e një hapi më tej drejt drejtësisë që shqiptarët kërkojnë dhe meritojnë”, shkruan Ambasada Amerikane në faqen e saj zyrtare.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.