Nis punën Kadastra – Lame: Probleme të rënda me hartat e hipotekave, 80 mijë legalizime pa tapi
80 mijë objekte informale që janë legalizuar nga ALUIZNI, nuk janë regjistruar në hipotekë. Shifra është bërë publike nga Kreu i sapoemëruar i Agjencisë Shtetërore të Kadastrës, Artan Lame gjatë një takimi informal me gazetarët.
Lame tha se shifra është gjithsesi e përkohshme dhe shanset që ajo të rritet janë mjaft të mëdha. Shkak i vonesës në regjistrim sipas Lames janë në pjesën dërrmuese të rasteve mospërputhjet mes hartave të ALUIZNI-t dhe atyre të Zyrave të Regjistrimit të Pasurive.
Për këtë arsye Kadastra e sapo ngritur po planifikon krijimin e një skedari ku të depozitohen të gjitha lejet e legalizimeve të miratuara, për t’u regjistruar më pas në hipoteka pas krijimit të hartës së re të këtij institucioni.
Ndërkohë që fokusi qendror i punës së Agjencisë Shtetërore të Kadastrës në vijim do jetë përmirësimi i sistemit hartografik të zyrave të regjistrimit dhe krijimi i një sistemi me të dhëna të sakta kadastrale. Lame tha se aktualisht sistemi hartografik i hipotekave është thuajse i papërdorshëm, dhe se puna për përditësimin dhe zëvendësimin e tij do të nisë thuajse nga fillimi.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.