Nis punimet Samiti i Poznanit – Do të mbahet deri më 5 korrik, kur do të takohen liderët e rajonit me ata të BE
Samiti i Ballkanit Perëndimor për vitin 2019 nis zyrtarisht punimet këtë të Martë. Samiti i këtij viti mbahet në Poznan të Polonisë.
Ky eveniment mbahet çdo vit, në kuadër të procesit të Berlinit, dhe çdo vit zgjidhen qytete të ndryshme. Vitin e kaluar u mbajt në Londër. Punimet e samitit të Poznan do të mbahen prej datës 3 deri në datën 5 korrik. Të Martën do të mblidhet forumi Think Tank, ku do të diskutohen sfidat e reja të Bashkimit Europian si dhe të rajonit, por edhe problemet e ndryshme, sociale, ekonomike dhe të punësimit. Të ftuar për të folur në këtë forum do të jenë personalitete nga vende të ndryshme të rajonit dhe të Bashkimit Europian. Nga Shqipëria do të jetë z.Ardian Haçkaj. Të Mërkurën, më datë 4 korrik do të mbahet forumi i shoqërisë civile, ku do të mblidhen një numër i madh aktivistësh nga rajoni dhe BE.
Gjatë forumit të shoqërisë civile fjalën do të marrin edhe Majlinda Bregu, Johannes Hahn, si dhe disa ministra nga rajoni dhe zyrtarë të lartë të Bashkimit Europoian. Të njëjtën ditë, pra të Mërkurën, dot ë mbahet edhe forumi i biznesit, nën moton: “të rritemi së bashku”. Energjia e rinovueshme, zhvillimi i infrastrukturës digjitale, ushqimi dhe teknologjia agro-bujqësore do të jenë temat kryesore. Të mërkurën do të mbahet gjithashtu edhe takimi i ministrave të jashtëm të rajonit, të cilët do të zhvillojnë edhe takime bilaterale mes tyre. Samiti i liderëve ndërkohë, pra të kryeministrave të Ballkanit Perëndimor do të mbahet të nesërmen, ditën e Enjte, më 5 korrik.
E pranishme gjatë samitit të liderëve do të jetë edhe Angela Merkel, e cila do të zhvillojë edhe konferencën përmbyllëse të samitit të këtij viti, së bashku me kryeministrin polak, atë bullgar dhe Zoran Zaev të Maqedonisë së Veriut, sipas agjendës zyrtare të qeverisë polake. Samiti i këtij viti është i 6-ti që zhvillohet, dhe veç vendeve të rajonit, anëtare të procesit të Berlinit janë edhe Gjermania, Franca, Italia apo edhe Austria e Mbretëria e Bashkuar.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.