Nis rënia e rasteve me Koronavirus, ekspertët kinezë flasin për një fund në muajin Prill
Kina raportoi këtë javë numrin më të ulët të rasteve të reja që prej fundit të Janarit, duke u përputhur me parashikimet e ekspertëve se përhapja e virusit mund të arrijë në një fund deri në muajin Prill.
Tregjet botërore morën nxitje nga perspektiva, por ekspertë të tjerë ndërkombëtarë nuk janë dakord me këtë dhe kanë alarmuar mbi përhapjen e virusit, që ka vrarë mbi 1,100 persona deri më tani. Këshilltari mjekësor i qeverisë në Kinë, Zhong Nanshan, që fitoi famë gjatë virusit SARS në vitin 2003, tha se numri i rasteve të reja ka nisur rënien në disa provinca dhe do të arrijë në një pikë të kthesës në fund të këtij muaji:
“Shpresoj që ky infeksion të arrijë drejt fundit nga muaji Prill”, tha Zhong. Numri total i të infektuarve në Kinë shënoi 44,653, me 2,015 raste të konfirmuara ditën e Martë, që është numri më i ulët i rasteve të reja ditore që prej 30 Janarit.
Megjithatë, ka pasur dyshime mbi besueshmërinë e shifrave. Numri i vdekjeve brenda Kinës u rrit me 97 në 1,113. Ndërkohë që zyrtarët kinezë thonë se situata është nën kontroll, Organizata Botërore e Shëndetësisë paralajmëroi se epidemia përbën një kërcënim botëror më të rrezikshëm se terrorizmi.
“Bota duhet të zgjohet dhe konsiderojë këtë virus si armikun numër një të shëndetit publik”, tha Tedros Ghebreyesus, shefi i Organizatës, duke shtuar se vaksina do të kërkojë 18 muaj për t’u zhvilluar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.