Nis shpërndarja e fletëve të votimit – KQZ: Ka përfunduar printimi, dorëzohen të premten në gjashtë qytetet e para

Komisioni Qendror i zgjedhjeve ka shuar çdo polemikë mbi rrezikun se fletët e votimit për zgjedhjet e 25 prillit nuk do të jenë gati në kohë. Përmes një njoftimi zyrtar, KQZ bëri me dije këtë të premte se Ka përfunduar printimi dhe paketimi i fletëve të votimit për qarqet Vlorë, Korçë, Berat, Gjirokastër, Elbasan & Fier dhe mbërrijnë në Shqipëri brenda ditës së sotme.

Fletët e Votimit po printohen nga kompania sllovene Cetis, ndërkohë që për shkak të kompleksitetit të tyre, u vu në pikëpyetje edhe dorëzimi në kohë i tyre.

Në këto zgjedhje do të votohet vetëm me një fletë votimit, ndërkohë që në të janë të shënuara emrat e subjekteve zgjedhore (parti politike, koalicione ose kandidatë të pavarur), dhe në secilin rresht ku është shënuar emri i subjektit zgjedhor janë të shënuar në vazhdim numrat e kandidatëve të atij subjekti sipas renditjes në listën e dorëzuar në KQZ.

Qytetarët do mund të votojnë subjektin zgjedhor (parti/koalicion) si dhe të mos votojnë për asnjë nga kandidatët e atij subjekti zgjedhor. Në këtë rast vota i shkon listës së kandidatëve në tërësi sipas renditjes që ka paraqitur subjekti zgjedhor; Qytetarët mund të votojnë subjektin zgjedhor si dhe vetëm njërin nga kandidatët e atij subjekti.

Në këtë rast vota i shkon subjektit zgjedhor. Është gjithashtu votë edhe për kandidatin e atij subjekti; ndërkohë që zgjedhësit do mund të votojnë edhe vetëm për një kandidat (duke shënuar X ose + vetëm në kutinë që i korrespondon numrit të kandidatit të preferuar), pa votuar subjektin zgjedhor të cilit i përket ai kandidat. Në këtë rast vota shkon për kandidatin, por shkon edhe për subjektin të cilit i përket kandidati.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.