Nis punimet Forumi i Biznesit “Shqipëri – Ukrainë, synohet bashkëpunimi mes dy vendeve. Pritet nënshkrimi i disa marrëveshjeve
Nis punimet në Tiranë Forumi i Biznesit “Shqipëri – Ukrainë: Një hap përpara’. Ky event i rëndësishëm i iniciuar nga Qendra e Eksporteve Shqiptare, me bashkëorganizatorë Agjencinë Shqiptare të Zhvillimit të Investimeve, AIDA dhe mbështetjen e “Albanian Food Industry”, si edhe “Dhomën e Tregtisë dhe Industrisë së Donetskut”, Ukrainë ka si qëllim kryesor forcimin e bashkëpunimit mes dy vendeve.
Në këtë aktivitet të rëndësishëm në të cilin janë të pranishëm përfaqësues të lartë të dy vendeve do të nënshkruhen marrëveshje bashkëpunimi, me theks të veçantë partneritetin tregtar dhe investimet.
Pas nënshkrimit të memorandumeve të mirëkuptimit do të vazhdojnë me takimet B2B ndërmjet kompanive ukrainase dhe atyre shqiptare, të cilat kanë shprehur interesin e tyre për bashkëpunim.
Pjesëmarrës në forum dhe në takimet e formatit “B2B” do të jenë një sërë kompanish të mirënjohura ukrainase dhe shqiptare nga sektorët e ushqimit, pijeve, produkteve të agrikulturës, turizmit, makinerive, shërbimeve juridike e financiare, supermarketeve, etj.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.