Nis vaksinimi i të moshuarve personalitete, Rama: “Ka edhe të tjerë, nuk po bëhen diferencime”
Ka nisur vaksinimi kundër COVID-19, i personaliteteve në të 80-tat në stadiumin “Air Albania”. I pranishëm për të parë nga afër procesin ishte edhe Kryeministri Edi Rama . Në një dalje për mediat, Rama iu përgjigj kritikave duke thënë se nuk po diskriminohet askush dhe se të gjithë ata që po vaksinohen janë personalitet dhe persona të tjerë mbi 80 vjeç.
“Bëhet fjalë për të filluar vaksinimin me personalitete, që janë 80-vjeçarë dhe për të dhënë një mesazh solidariteti me ta, një mesazh përkujdesjeje për ta. Vë re një far sekëlldie kur këta njerëz ndahen nga jeta, ka një moment lotderdhje dhe rrjedhje fjalësh e fjalimesh për ta, që nuk ma ha mendja se do të dukeshin më bukur, nëse ne do duhej të përballeshim larg qoftë me humbjen e ndonjërit prej tyre, për shkak të mungesës së vaksinës. Nga ana tjetër, edhe për të shfrytëzuar pozitivisht imazhin dhe influencën e tyre te njerëzit, në kushtet kur vaksinimi është një fushatë kudo. Nuk janë as të parët me diferencë, janë të parët në një ditë të parë, ku do të vaksinohen edhe njerëz të zakonshëm. Fillon me ta në mënyrë simbolike, në mënyrë shembullore, për të vijuar me tjerët.” – u shpreh kryeministri.
Rama foli për skenarin e vaksinimit duke e quajtur një ambicie të madhe sigurimin e vaksinave, në një kohë që nuk ka.
“Do të vazhdojmë me më të moshuarit dhe pastaj me këto kategori. Rëndësi ka që me dozat që kemi në dispozicion do të përfundojmë plotësisht vaksinimin e mjekëve dhe infermierëve. Po punojmë çdo ditë e natë për të garantuar më shumë doza, më shpejt. Ne kemi arsye të jemi besimplotë që do ja dalim për skenarin e vaksinimit për 14 muaj. Është një ambicie e madhe. Dua t’iu them disave që thonë ‘shkoni e merrini nga Kina, jepni lekët’. Nuk kanë nxjerrë tezga dhe o burra kush shkon t’i marrë. E vërteta është se nuk ka vaksina. Ne jemi besimplotë se do të kemi një qartësi shumë shpejt dhe një bazë të gjerë dozash.”
Sipas kryeministrit, gjatë 24 orëve është parashikuar ta marrin vaksinën 80 persona, mbi 80 vjeç, mes të cilëve 20 personalitete.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.