Nis vaksinimi me SinoVac. Çadra në sheshin “Skënderbej”, premtimi i Ramës: “Në fund të majit, 500 mijë vetë të vaksinuar”
28 marsi shënoi atë, që qeveria e ka konsideruar vaksinimin masiv të popullatës për COVID-19. Me ardhjen e 192 mijë dozave të vaksinës së prodhuar nga kompania kineze Sinovac, numri i vaksinimeve në ditë do të rritet, teksa sipas deklaratave të Ministrisë së Shëndetësisë synohet kalimi i mbi 10 mijë qytetarëve në ditë. Për të përshpejtuar procesin e vaksinimit, në sheshin Skënderbej janë ngritur disa çadra, ndërkohë që në shërbim janë vendosur edhe stafet mjekësore ë ushtrisë.
I pranishëm në nisjen e procesit të vaksinimit me vaksinën e Sinovac, kryeministri Edi Rama premtoi vaksinimin e 500 mijë qytetarëve, deri në fundin e muajit maj, me synimin për arritjen e një sezoni të suksesshëm turistik.
Rama tha gjithashtu se po vazhdohet me përpjekjen e sigurimit të vaksinave të tjera, duke synuar që i gjithë procesi të përmbyllet përpara planit 14 mujor .
Aktualisht, në vendin tonë kanë mbërritur në total 282 325 doza, nga të cilat: 38 400 Astrazeneca, 10 mijë Sputnik V, 41 925 Pfizer dhe 192 mijë janë vaksina të Sinovac. Sipas planit të bërë publik, fillimisht do të vaksinohen grupmoshat mbi 80 vjeç e më pas duke zbritur gradualisht në +75 vjeç dhe +70 vjeç. Sipas të dhënave nga Instituti i Statisitikave në vend, në grupmoshën mbi 70 vjeç përfshihen në total 277 712 persona, për të cilët nevojiten 555 424 doza vaksinë. Ndërkohë që, paralelisht qeveria ka nisur vaksinimin e personelit shëndetësor, mësuesve dhe pedagogëve.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.