Nisin kurset e Akademisë së Forcave të Armatosura për 2017-2018, Xhaçka: Trajtim i veçantë për stafin akademik
Nisin kurset e Akademisë së Forcave të Armatosura (AFA) për vitin akademik 2017 – 2018. Ceremonia e nisjes së kurseve u zhvillua në mjediset e Ministrisë së Mbrojtjes, ku e pranishme ishte edhe ministrja e Mbrojtjes Olta Xhaçka, e cila shoqërohej nga shefi i Shtabit të Përgjithshëm të FA gjeneral brigade Bardhyl Kollçaku dhe komandantët e forcave.
Në fjalën e saj, ministrja Xhaçka uroi kursantët për nisjen e vitit të ri akademik dhe shprehu besimin për ngritjen e mëtejshme të cilësisë së atyre që, siç tha ajo, “kanë zgjedhur të jenë siguria edhe mbrojtja e vendit.”
Më tej ajo vlerësoi rolin e arsimimit në rritjen e profesionalizmit të Forcave të Armatosura, si një nga kërkesat e programit qeverisës.
“Programi i ri i qeverisë shqiptare për sigurinë dhe mbrojtjen e vendit, kërkon rritjen e profesionalizmit, ndërveprimit dhe operacionalitetit të Forcave të Armatosura, kërkon vijimin e transformimit, modernizimit e përmbushjen e angazhimeve në kuadër të Aleancës, zbatimin e dokumenteve strategjike, zhvillimin e kapaciteteve dhe garantimin e sigurisë dhe përballimin e të gjithë skenarëve të kërcënimeve. Si rrjedhojë, kërkon një qasje të re në zhvillimin dhe konsolidimin e sistemit arsimor, për ta bërë atë sa më cilësor, sa më fleksibël, në funksion të zhvillimit të vetë Forcave të Armatosura dhe të shoqërisë. Arsimimi, në mënyrë të vazhdueshme duhet t’i paraprijë transformimit të Forcave të Armatosura, duke përditësuar metodologjinë, programet mësimore dhe doktrinat ushtarake, për të unifikuar proceset dhe për të siguruar ndërveprueshmërinë me aleatët, me qëllim që t’u përgjigjet nevojave kombëtare, në kushtet e një mjedisi të ri të sigurisë, duke qenë i përputhshëm me sistemin e arsimit kombëtar dhe shkollave të vendeve të NATO.” – u shpreh ministrja Xhaçka, e cila përmendi gjithashtu edhe trajtimin me VKM të veçantë të stafit akademik të Akademisë së FA, duke e barazuar me stafin akademik të institucioneve të tjera të arsimit të lartë, për të cilin ajo tha se është një vlerësim që qeveria shqiptare i bën këtij institucioni dhe vetë Forcave të Armatosura.”
Akademia e FA, e cila këtë vit akademik shënon 60-vjetorin e krijimit të këtij institucioni arsimor ushtarak, zhvillon të gjitha kurset e karrierës së ushtarakut, duke nisur nga Kursi i Lartë i Sigurisë dhe Mbrojtjes (KLSM), Kursi i Komandës dhe Shtabit të Përgjithshëm (KKSHP), Kursi Themelor i Oficerit të Shtabit (KTHOSH) dhe Kursi i Arsimimit të Përgatitjes së Oficerëve të Rinj (KAPO).
Kursi i Lartë i Sigurisë dhe Mbrojtjes për këtë vit akademik ndiqet nga 16 ushtarakë dhe civilë të nivelit të lartë, nga dhjetë vende të NATO dhe ato partnere, si Shqipëria, Britania e Madhe, Italia, Greqia, Rumania, Turqia, Kosova, Gjeorgjia dhe Maqedonia.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.