Nisin punimet në Prishtinë për “parkun e të martuarve” – Ja koncepti dhe si do të duket (FOTO)
Komuna e Prishtinës ka njoftuar zyrtarisht se ka nisur puna për rregullimin e parkut të të martuarve, i pari park i këtij lloji në Kosovë.
Punimet në këtë fazë do të fokusohen në rregullimin e shtigjeve, stolave dhe hapësirave të tjera të këtij parku dhe pritet që rregullimi bazik të përfundojë shumë shpejt.
Më pas, parku do të pasurohet në vazhdimësi nga çiftet, të cilat do të martohen në kryeqytet, ku secili do të mbjellë në këtë nga një fidan. Në këtë mënyrë, bashkëshortët e rinj, përveçse do të shënjojnë lidhjen e tyre, do të ndikojnë drejtpërsëdrejti në zgjerimin e hapësirave të gjelbërta në qytet.
Komuna shprehet se pret bashkëpunimin e sa më shumë qytetarëve në këtë projekt të veçantë, me shumë rëndësi për të përmirësuar mjedisin në Prishtinë.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.