Nisin regjistrimet në kopshte. Drejtoria e Tiranës: Afati i aplikimit 1-11 shtator, ja dokumentet që nevojiten
Prej datës 1 shtator do të nisin procedurat e aplikimit për regjistrimin në kopshtet publike të Tiranës. Drejtoria e Përgjithshme e Çerdheve dhe Kopshteve në Tiranë ka bërë me dije se aplikimi do të kryhet pranë kopshtit ku synohet të regjistrohet fëmija, ndërkohë që afati i fundit për dorëzimin e dokumentacionit është data 11 shtator.
Prindërit do të duhet të dorëzojnë disa dokumente, që janë: certifikata personale dhe familjare e fëmijës, vërtetimi i punës me pagë mujore të pasqyruar, të kujdestarit ligjor ( të prindërve ) si dhe vërtetimi i banimit.
Gjithashtu, dokumentacioni duhet plotësuar me vërtetimin për Kontributet e Sigurimeve Shoqërore e Shëndetësore për Individit të kujdestarit ligjor. Gjithashtu, duke marrë në konsideratë situatëne krijuar nga COVID-19, për të evituar kohën fizike të qëndrimit në kopsht si dhe për të evituar kontaktet me shumë njerëz do të duhet të dorëzohet formular i plotësuar i aplikimit, që mund të shkarkohet në faqen femijetetiranes.al.
Ndërkaq, për disa kategori të veçanta, sikurse janë fëmijët jetimë, fëmijët e familjeve që trajtohen me ndihmë ekonomike apo kanë kujdestar ligjor persona me aftësi të kufizuar, mund të përfitojnë reduktimin e pagesës, duke dorëzuar dokumentacionin shtesë që vërteton gjendjen e tyre socio-ekonomike. Aktualisht tarifa për frekuentimin e kopshteve publike është 160 lekë në ditë.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.