Nisma sensibilizuese “Sheh diçka, thuaj diçka”/ Veliu në Shkodër: Ju garantoj anonimatin dhe reagim të menjëhershëm!
Prefekti i Qarkut të Shkodrës ka ndërmarrë një nismë sensibilizuese në mbështetje të policisë. “Sheh diçka, thuaj diçka” synon të përfshijë qytetarët për të dhënë kontributin e tyre në luftën kundër krimit.
Takimi i parë u zhvillua në shkollën e mesme “28 nëntori” . Në aktivitet morën pjesë zëvendësministrat e Brendshëm, Besfort Lamallari dhe Romina Kuko, Drejtori i Përgjithshëm i Policisë së Shtetit, Ardi Veliu, përfaqësues të komuniteteve fetare, të institucioneve si dhe nxënësit e shkollave të mesme të qytetit.
“Denonconi në numrin 112 apo në Komisariatin Dixhital, rastet e paligjshmërisë, në çdo fushë ku konstatoni paligjshmëri, por jo vetëm.
Denonconi punonjësit e Policisë që nuk meritojnë besimin tuaj, që nuk meritojnë të paguhen nga taksat tuaja, që shpërdorojnë besimin tuaj” u shpreh Drejtori i Përgjithshëm i Policisë së Shtetit Ardi Veliu.
Gjatë fjalës së tij Veliu garantoi anonimatin dhe reagimin e menjëhershëm e të paanshëm nga ana e policisë.
Jenida Vladi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.