Nismat në arsim – Malaj për “3 lëndë në 6 orë”: Nuk jemi gati, duhet investim në shkolla
Arsimi në Shqipëri nuk është ende gati për nismën “3 lëndë në 6 orë”’. Ish zv ministrja, aktualisht deputete e LSI , Nora Malaj, u shpreh për televizionin SCAN se duhet investim paraprak për të implementuar më pas këtë nismë. Malaj renditi disa masa që duhet të ndërmerren nga Ministria e Arsimit në këtë drejtim duke filluar me krijimin e kushteve , ofrimin e vakteve ushqimore për nxënësit si edhe trajnimi i mësuesve ku vetëm 30% janë të trajnuar.
“Ne ende nuk kemi shkolla të gatshme për të realizuar këtë nismë. Do ishte shumë mirë të bëhej nëse do kishim shkolla të gatshme do bëhej e plotë dhe me paketën e idesë që në krye të herës edhe kur isha unë në qeveri bashkë me Prof. Panaritin edhe sot qeveria e vazhdon idenë e një vakti në shkollë, e cila mund të jetë mëngjes apo mund të jetë drekë dhe kjo mund ta ndihmojë fëmijën, sidomos ato që kanë problem me obezitetin apo me aneminë. Për ta realizuar të plotë këtë gjë, duhet që të ketë një bazë logjistike që për fatin tonë të keq neve nuk e kemi. Për të realizuar të plotë këtë gjë duhet që mësuesi të jetë shumë i trajnuar, që për fatin tonë neve ende nuk e kemi, pasi ju e dini që përpara një viti e gjysmë, kur unë isha zëvendësministre dhe kur ishim pjesë e qeverisë ne bëmë një matje të nevojave të mësuesve dhe nga raporti 30 për qind e mësuesve ishin të aftë.”
Malaj nënvizoi si të rëndësishëm pilotimin paraprak të nismës për të shmangur pasojat . Një ndërhyrje e tillë sipas Malajt do të sillte dëme të mëdha në sistem.
“Nëse do ta bëjmë këtë gjë, kostoja do jetë edhe më e madhe. Atëherë si do të operohet të gjtiha këto? Pra, ka një sërë pyetjesh të cilat të bëjnë që ti të jesh skeptike dhe nëse do ta doje shumë që të realizohet, ti mendon që më mirë të nisej si projekt pilot, pasi çdo nismë kombëtare para se të fillojë ka një detyrim ligjor, ka bazën e nisjes së projektit pilot, që do të thotë e bën të matshëm dhe pasi ti e bën të matshëm dhe përgatit gjithë sistemin, atëherë ti mund ta realizosh dhe pse jo të gjithë faktorët mund të jenë të gatshëm.”
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.