Niveli i pandëshkueshmërisë, mesatar – Raporti për 2017, të fundit në rajon, korrupsioni nuk llogaritet
Shqipëria është e 32-ta në botë, ndër 69 vende, në indeksin e pandëshkueshmërisë 2017. Numri një në renditje përfaqëson vendin që ka nivelin më të lartë të pandëshkueshmërisë, ndërkohë që vendi i renditur i 69-ti është vendi me nivelin më të lartë të ndëshkueshmërisë, e që përkon pikërisht me Kroacinë, një prej vendeve që merret shpeshherë si shembull për t’u ndjekur në këtë drejtim.
Me pandëshkueshmëri studimi nuk i referohet vetëm gjyqësorit.
Në raportin e kaluar, Shqipëria renditej tre pozicione më keq, por asokohe, në vlerësim merreshin vetëm 59 shtetet, dhe jo 69. Indeksi përpilohet mbi bazën e tre kritereve kyç: veç sistemit të drejtësisë, në vlerësim merret edhe ai i sigurisë, pra pandëshkueshmëria që është produkt i forcave të ruajtjes së rendit, si dhe të drejtat e njeriut. Shqipëria regjistron performancën më të dobët në atë që i referohet sistemit të drejtësisë.
Në këtë raport, shtetet klasifikohen në katër kategori; ata që kanë nivel shumë të ulët pandëshkueshmërire, ata që kanë nivel të ulët, nivel mesatar dhe ata që kanë nivel maksimal pandëshkueshmërie. Vendi ynë renditet në radhën e atyre që kanë nivel mesatar pandëshkueshmërie.
Metologjia e përllogaritjes së indeksit nuk merr për bazë korrupsionin në politikë apo në sistemin e drejtësisë. Madje, mes rreshtave thuhet se: pavarësisht se në vendet e Europës lindore, si Shqipëria, korrupsioni është rritur dhe demokracia është dobësuar, nuk kemi prova për ta përfshirë korrupsionin në përllogaritjen e indeksit. Sundimi i ligjit dhe përmirësimi i barazisë socio-ekonomike vlerësohen si dy faktorët kryesorë që luftojnë pandëshkueshmërinë.
Bosnje Hercegovina, Serbia dhe Mali i Zi janë ndër vendet që qëndrojnë në krye të listës, si shtete me nivel mjaft të ulët të pandëshkueshmërisë. Studimi arrin në përfundimin se, niveli i lartë i pandëshkueshmërisë prodhon zhvillim të pamjaftueshëm ekonomik, vështirësi në tërheqjen e investimeve të huaja, si dhe vështirësi në tërheqjen e turistëve.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.